ალექსანდრ დუგინის თქმით, დარია დუგინის მკვლელობა "უკრაინის ნაცისტური რეჟიმის ტერორისტული აქტია".

რატომ არის მნიშვნელოვანი: რუსეთში ვლადიმერ პუტინის იდეოლოგის, ალექსანდრ დუგინის შვილი მანქანის აფეთქების შედეგად დაიღუპა.

  • უკრაინული მედიების ცნობით, ოკუპანტებმა მომხდარში უკრაინა დაადანაშაულეს.

  • "ახლა პროპაგანდისტები აქტიურად ავრცელებენ ჰიპოთეზას, რომ მანქანა უკრაინელმა "ნაციონალისტებმა" ააფეთქეს", — წერს Unian.

კიდევ რას ამბობს დუგინი: დუგინის თქმით, მისი შვილი ლამაზი მართლმადიდებელი ქალი იყო, პატრიოტი, ომის რეპორტიორი, ცენტრალური ტელევიზიის ექსპერტი და ფილოსოფოსი.

  • "ჩვენ გვჭირდება მხოლოდ გამარჯვება. ჩემმა ქალიშვილმა მისი ახალგაზრდა სიცოცხლე მის საკურთხეველს შესწირა. ამიტომ გთხოვთ, მიაღწიეთ ამას!", — აცხადებს დუგინი.

ვინ არის დარია დუგინა: ის პუტინის მთავარი იდეოლოგის, ალექსანდრ დუგინის შვილია და ბოლო წლებში მამის ერთ-ერთ უახლოეს თანამოაზრედ მიიჩნეოდა.

  • როგორც Meduza წერს, დუგინა დამოუკიდებელი "პოლიტოლოგისა" და პუბლიცისტის როლს ითავსებდა, ფსევდონიმით პლატონოვა.
  • არაერთხელ გამოჩნდა რუსულ სამთავრობო მედიაში, სადაც პროსახელისუფლებო შეხედულებებს ავრცელებდა, აკრიტიკებდა დასავლეთს და უკრაინაში შეჭრას უჭერდა მხარს.
  • 2021 წელს, რუსულ პირველ არხის გადაცემაში, რომელიც საომარი ისტერიის გაზრდას ემსახურებოდა, უკრაინას სანიტარული კორიდორი უწოდა, რომელიც "რუსეთს ევროპისგან აშორებს".

უკრაინაში შეჭრას დუგინამ საჯაროდ დაუჭირა მხარი და ტელეგრამის არხზე რუსეთის დიდებაზე იმპერიალისტური შინაარსის პოსტი გამოქვეყნა.

  • ის ორჯერ მოხვდა დიდი ბრიტანეთისა და ავსტრალიის სანქცირებულთა სიაში, რაზეც თქვა: "მათ უკეთესი ვერავინ იპოვეს და მე, რიგითი ჟურნალისტი შემიყვანეს, რომელსაც ქონება არ აქვს".
  • ბრიტანეთის ხელისუფლებამ მისი დასანქცირება იმით ახსნა, რომ ხშირად ავრცელებდა დეზინფორმაციას, ხელს უწყობდა რუსეთის აგრესიულ პოლიტიკასა და ქმედებებს, რომელიც უკრაინის ტერიტორიულ მთლიანობასა და დამოუკიდებლობას უთხრის ძირს.
  • ივნისის შუა რიცხვებში ის აზოვსტალის ქარხანას ეწვია და პროპაგანდისტული რეპორტაჟი მოამზადა.
  • თავის ბოლო მოხსენებაში კი ცდილობდა დაემტკიცებინა, რომ ბუჩას მკვლელობები დადგმული იყო.

თანამშრომლობდა გამომცემლობასთან, რომელსაც შემოდგომაზე "წიგნი Z" უნდა გამოეცა — მეგობრობდა მის დამფუძნებელთანაც.

  • გამოცემის ვებგვერდზე ვკითხულობთ, რომ წიგნში ომის მონაწილეებისა და თვითმხილველების მიერ მოთხრობილი ამბები უნდა შესულიყო.
  • ამ ისტორიების დაწერას სხვებთან ერთად, აპირებდა დუგინაც — 21 აგვისტოს გამომცემლობამ განაცხადა, რომ მას მასალა მალე უნდა წარედგინა.
  • ახლა ისინი დუგინას სტატიაზე დაფუძნებული ტექსტის გამოქვეყნებას აპირებენ და ამბობენ, რომ პუბლიკაციას მას მიუძღვნიან.