ტობიას ელვუდი თემთა პალატის თავდაცვის კომიტეტის თავმჯდომარეა.

რატომ არის მნიშვნელოვანი: ევროპაში ყველაზე დიდი ატომურ ელექტროსადგურს მარტის დასაწყისიდან ოკუპანტები აკონტროლებენ, თუმცა მას კვლავ უკრაინელი ტექნიკოსები მართავენ. ობიექტი არაერთხელ დაიბომბა, რაც საფრთხეს კიდევ უფრო ზრდის.

  • უკრაინის პრეზიდენტი ვოლოდიმირ ზელენსკი რუსეთს "ბირთვულ შანტაჟში" ადანაშაულებს ელექტროსადგურში დაძაბულობის გამო.
  • ოფიციალური კიევის თქმით, რუსეთმა კომპლექსში 500-მდე ჯარისკაცი განათავსა, რომლებიც მას ფარად იყენებენ უკრაინის ქალაქებზე თავდასხმების განსახორციელებლად.

დეტალები: ბრიტანელმა დეპუტატმა Twitter-ზე დაწერა: "ნებისმიერი მიზანმიმართული დაზიანება, რომელიც გამოიწვევს უკრაინის ბირთვულ რეაქტორს რადიაციის პოტენციურ გაჟონვას, იქნება NATO-ს მე-5 მუხლის დარღვევა".

  • NATO-ს მე-5 მუხლი: ესაა კოლექტიური თავდაცვის პრინციპი — NATO-ს ერთ წევრზე თავდასხმა მის ყველა წევრზე თავდასხმაა.

  • ელვუდის განცხადება რესპუბლიკელმა კონგრესმენმა, ადამ კინზინგერმაც გადატვიტა და თქვა, რომ ეს 100 პროცენტით სიმართლეა.
  • "ეს მართლაც არ ექვემდებარება განხილვას. ნატოს ქვეყნებში ადამიანების დახოცვა მე-5 მუხლის დარღვევაა", — წერს კინზინგერი.

ბოლო ინფორმაცია: რუსეთი პუტინისა და მაკრონის საუბრის შემდეგ დათანხმდა ატომურ ელექროსადგურში სპეციალისტების შესვლას. თავდაპირველად ინფორმაცია საფრანგეთის პრეზიდენტის ოფისმა გაავრცელა.

  • ატომური ენერგიის საერთაშორისო სააგენტოს ხელმძღვანელის თქმით მზადაა, თავად უხელმძღვანელოს ამ ვიზიტს.

  • ატომური სადგურის შემოწმების პერსპექტივას როგორც BBC წერს, უკრაინაც მიესალმება, თუმცა ვოლოდიმირ ზელენსკიმ თქვა, რომ კონკრეტული დეტალები ჯერაც ზუსტდება.

  • “თუ გაგრძელდება რუსული შანტაჟი რადიაციით, ეს ზაფხული შეიძლება დარჩეს ევროპის სხვადასხვა ქვეყნის ისტორიაში, როგორც ყველა დროის ერთ-ერთი ყველაზე ტრაგიკული”, — ამბობს უკრაინის პრეზიდენტი.

არქივიდან: გაერომ 11 აგვისტოს მხარეებს მოუწოდა, ზაპოროჟიეს ატომური ელექტროსადგურიდან სამხედროები გაეყვანათ. თუმცა, ცნობილი გახდა, რომ რუსეთმა გაეროს შეთავაზება უარყო.

  • გაეროს გენერალური მდივანი ანტონიო გუტერეში ტერიტორიის დემილიტარიზაციას ითხოვს. მისი თქმით, ობიექტში ნებისმიერი პოტენციური დაზიანება თვითმკვლელობა იქნება.