NGO-ები აცხადებენ, რომ პროცესის ინკლუზიურობის უზრუნველსაყოფად 30 აგვისტომდე უფლებადამცველებს, უფლებადამცველ ჯგუფებს და უფლებადაცვით ორგანიზაციებს საშუალება ექნებათ შეუერთდნენ მათ. შემდეგ კი შეიმუშავებენ იმ კრიტერიუმებს, რომლის მიხედვითაც ომბუდსმენი უნდა შეირჩეს.

რატომ არის მნიშვნელოვანი: ევროკავშირის მიერ გაცემულ 12 რეკომენდაციაში, ერთ-ერთი სახალხო დამცველის გამჭვირვალედ და დემოკრატიულად არჩევას უკავშირდება.

  • მოქმედ სახალხო დამცველს ნინო ლომჯარიას უფლებამოსილება წლის ბოლოს ეწურება.
  • ახალი ომბუდსმენი პარლამენტმა მინიმუმ 90 ხმით უნდა აირჩიოს.

NGO-ების განცხადებით, უზრუნველყოფენ დებატებს, რათა საზოგადოებამ მათ მიერ შერჩეული კანდიდატები გაიცნოს.

  • პარტიებს შესთავაზებენ რამდენიმე პირს, რის შემდეგაც შერჩეული კანდიდატების წარდგენა ოფიციალურად მოხდება პარლამენტში.
  • მათი თქმით, საერთაშორისო სტანდარტების მიხედვით, სახალხო დამცველის არჩევის პროცესში აუცილებელია, სოციალური ძალების პლურალისტური წარმომადგენლობის უზრუნველყოფა.
  • "საჭიროა, ფართო კონსულტაციებისს, განხილვების, შერჩევისა და დანიშვნის პროცესის ხელშეწყობა და ომბუდსმენობის აპლიკანტების შეფასება წინასწარ განსაზღვრული, ობიექტური და საჯაროდ ხელმისაწვდომი, პროფესიონალურ თვისებებსა და დამსახურებებზე დაფუძნებული კრიტერიუმების საფუძველზე".

სტანდარტების უზრუნველსაყოფად კი არასამთავრობო ორგანიზაციები იწყებენ დაინტერესებული ორგანიზაციების მოწვევას.

  • მათ უნდა ქონდეთ ადამიანის უფლებათა დაცვის სფეროში საქმიანობის გამოცდილება და ქვემორე ხელმომწერებიდან 3-მა ორგანიზაციამ უნდა გაუწიოს რეკომენდაცია.

გარდა ამისა, განცხადების ავტორები აღნიშნავენ, რომ ორგანიზაციების მიერ ომბუდსმენის კანდიდატების დასახელების წესი დეტალურად გაიწერება მას შემდეგ, რაც გაფართოებული შემადგენლობის ფორმირება დასრულდება.

  • სამოქალაქო სექტორის გაფართოებული შემადგენლობიდან კი 10 სუბიექტი შეძლებს ომბუდსმენის თითო კანდიდატის დასახელებას
  • "საქართველოს ტრადიციულად ჰყავს დამოუკიდებელი, მაღალკვალიფიცური და პარტიებთან არააფილირებული სახალხო დამცველები და სასიცოცხლოდ მნიშვნელოვანია, შენარჩუნდეს სახალხო დამცველის დამოუკიდებლობა მომავალშიც, წინამდებარე ინიციატივაც სწორედ ამ მიზნის მიღწევას ემსახურება".