ჩინეთში მცხოვრები ქალის თქმით, პოლიციამ იგი "უთანხმოებისა და დაძაბულობის გამოწვევის" ბრალდებით დააკავა. მიზეზი, არც მეტი, არც ნაკლები, იაპონური ეროვნული სამოსის, კიმონოს, ჩაცმა და ქუჩაში ასე გამოჩენა გახდა.

ქალს კიმონოსთან ერთად პარიკიც ეხურა და ცნობილი მანგის ერთ-ერთ პერსონაჟს განასახიერებდა. ქალაქ სუჭოუში ფოტოების გადაღებისას მას და მის ფოტოგრაფს პოლიციის ოფიცერი მიუახლოვდა. ამის შემდეგ ქალმა ვიდეოს გადაღება დაიწყო, სადაც ისმის, როგორ ყვირის პოლიციელი.

"ჰანფუში გამოწყობილი რომ მოსულიყავი, არაფერს გეტყოდი. მაგრამ ჩინელს კიმონო გაცვია. შენ ჩინელი ხარ! არა?", — ეუბნება პოლიციის ოფიცერი მას ხმამაღლა.

ქალის კითხვაზე, რატომ უყვირიან, პოლიციელი პასუხობს, რომ იგი საზოგადოებაში "უთანხმოებასა და დაძაბულობას იწვევს" — ეს ჩინეთში გავრცელებული ბრალდებაა, რომელსაც ხელისუფლება დისიდენტების, ჟურნალისტებისა და აქტივისტების წინააღმდეგ იყენებს.

ამის შემდეგ ვიდეო წყდება. როგორც ცნობილია, ქალი ადგილზევე დააპატიმრეს და განყოფილებაში გადაიყვანეს. მისი თქმით, იქ ღამის პირველ საათამდე დატოვეს, ჩამოართვეს კიმონო და ტელეფონი და უთხრეს, რომ შემთხვევის შესახებ ინტერნეტში არ ესაუბრა.

თუმცა, ვიდეო ინტერნეტში მაინც აღმოჩნდა და ის ათობით მილიონმა ადამიანმა ნახა. სუჭოუს პოლიცია შემთხვევას არ გამოხმაურებია. ამის მიუხედავად, სახელმწიფოს გავლენის ქვეშ მყოფმა მაუწყებელმა სოციალურ ქსელში კამპანია წამოიწყო და ხალხს ჰანფუს ტარებისკენ მოუწოდა.