დღეს, 17 მაისს, თბილისში პარლამენტის წინ ოჯახის დაცვისთვის მიმდინარე აქციაზე საჩხერის მუნიციპალიტეტის გამგებელს მადლობა გადაუხადეს. On.ge დაინტერესდა, რა როლი ჰქონდა თბილისში ორგანიზებულ აქციაში საჩხერის გამგებელს და რატომ გადაუხადეს მადლობა.

საკითხზე მუშაობისას გაირკვა, რომ საჩხერის მუნიციპალიტეტის გამგებელი არა კახა სამყურაშვილია, რომელსაც აქციაზე მადლობა გადაუხადეს, არამედ მალხაზ ბაზაძე. ბაზაძე ამბობს, რომ არც მუნიციპალიტეტის და არც მისი კერძო ფინანსებიდან ღონისძიება არ დაფინანსებულა და უკვირს, რატომ გადაუხადეს მადლობა.

კითხვაზე, გამოხატა თუ არ ამ აქციის მიმართ მხარდაჭერა, გამგებელი ასე პასუხობს: "მხარდაჭერა სხვა რამეა, დახმარება კიდევ სხვა. საერთოდ არ ვყოფილვარ ჩართული".

ის ამბობს, რომ იზიარებს ყველა იმ "სიწმინდეს, რა სიწმინდეც ქართველებს გააჩნიათ".

თუმცა, საჩხერის მუნიციპალიტეტის ფეისბუკ გვერდზე ოჯახის სიწმინდის დღესთან დაკავშირებით ინფორმაცია ჯერ კიდევ 16 მაისს გამოქვეყნდა. ტექსტში ნათქვამია, რომ 17 მაისს ოჯახის სიწმინდის დღე აღინიშნება.

"ამ დღეს საქართველოს მართლმადიდებლურ ტაძრებში აღევლინება ყოვლადწმინდა ღვთისმშობლის პარაკლისი, რათა დედა ღვთისამ თავისი მფარველი კალთა გადააფაროს ჩვენს ოჯახებს. ამ დღესთან დაკავშირებით მთელს საქართველოში იმართება მშვიდობიანი მსვლელობა," - ვკითხულობთ გამოქვეყნებულ ტექსტში.

როგორც გამგებელი ამბობს, ის ამ მსვლელობაში არ მონაწილეობდა.

"მე მხარს ვუჭერ ყველა სიწმინდეს, რომელიც გაგვაჩნია ქართველებს და არა სიბინძურეს,"- ამბობს გამგებელი. On.ge-ს სურდა გამგებლისთვის დამატებით ეკითხა, რას გულისხმობდა "სიბინძურეში" და ასევე, რას ფიქრობს ის 17 მაისს თბილისში ძალადობის წინააღმდეგ გამართულ აქციაზე, თუმცა გამგებელმა თქვა, რომ შეხვედრაზე იყო ტელეფონი გათიშა.

დღეს, ოჯახის სიწმინდისა და სიმტკიცის დასაცავად თბილისის რამდენიმე ადგილზე მოქალაქეების გარკვეული ჯგუფები დილიდან შეიკრიბნენ. თუმცა, პარალელურად მთავრობის კანცელარიის შენობის მიმდიებარე ტერიტორიაზე ძალადობის წინააღმდეგ აქცია იმართებოდა. ოჯახის სიწმინდის დასაცავ აქციაზე მყოფი პირების მცირე ჯგუფი, აქციაზე მისვლიდან რამდენიმე წუთში მთავრობის კანცელარიისკენ დაიძვრნენ, თუმცა, პოლიციამ არ მისცა მათ ძალადობის წინააღმდეგ გამართული აქციის მონაწილეებთან მიახლოების საშუალება.