ლგბტ აქტივისტებისა და მათი მხარდაჭერების საპროტესტო აქცია ძალადობის წინააღმდეგ, მთავრობის კანცელარიასთან მხოლოდ ერთ საათს გაგრძელდა. როგორც თავად აქტივისტები ამბობენ, შინაგან საქმეთა სამინისტრომ მათ სწორედ ეს დრო გამოუყო აქციის გასამართად და უსაფრთხოების უზრუნველყოფაზე პასუხისმგებლობაც აიღო. აქციის ჩატარების დრო და ადგილი, ბოლო წუთამდე, ადამიანთა მხოლოდ ვიწრო ჯგუფმა იცოდა. აქტივისტები თბილისის რამდენიმე უბნიდან მიკროავტობუსებით შსს-მ მიიყვანა დანიშნულების ადგილზე. როგორც თავად აქტივისტები მიიჩნევენ, აღნიშნული ფაქტი უკვე მიუთითებს იმაზე, თუ რა რთულ მდგომარეობაში არიან ლგბტ პირები საქართველოში, როგორია მათი ყოფა და რამდენად ხდება მათი დისკრიმინაცია.

აქციის მონაწილეებმა ხელისუფლებას ლგბტ პირთა მიმართ ჩადენილი დანაშაულების გამოძიებისკენ მოუწოდეს. აქცია ინციდენტების გარეშე დასრულდა. აქციის მონაწილეებთან მიახლოება სცადა სასულიერო პირთა ნაწილმა, თუმცა პოლიციამ მათ ამის საშუალება არ მისცა.

17 მაისს მთელ მსოფლიოში ჰომოფობიასთან ბრძოლის საერთაშორისო დღეს აღნიშნავენ, თუმცა მას შემდეგ, რაც 2013 წლის 17 მაისს თბილისში ჰომოფობიის წინააღმდეგ გამართული აქცია სასულიერო პირებმა და მათმა მხარდამჭერებმა დისკრიმინაციული მოტივებით დაარბიეს, ილია მეორის ინიციატივით, 17 მაისი საქართველოში ოჯახის სიმტკიცის დღედ გამოცხადდა. სწორედ ამიტომ, ამ დღეს სასულიერო პირები მართავენ მსვლელობას ხატებით მრევლთან ერთად.

On.ge ვრცელ რეპორტაჟს ორივე აქციიდან მოგვიანებით შემოგთავაზებთ.