პეტიცია ერთნაირსქესიანი წყვილების ქორწინების ლეგალიზაციაზე 2022 წლის 6 ივნისს დარეგისტრირდა და მას უკვე 25 000-ზე მეტი ადამიანი აწერს ხელს.

რატომ არის მნიშვნელოვანი: უკრაინის პრეზიდენტის განმარტებით, კონსტიტუციაში უწერიათ, რომ ქორწინება კაცსა და ქალს შორის თავისუფალ თანხმობას ეფუძნება, ხოლო ომის, ან საგანგებო სიტუაციის დროს უკრაინის კონსტიტუციის შეცვლა არ შეუძლიათ.

  • თუმცა მან ხაზგასმით აღნიშნა, რომ მთავრობა მუშაობს სამოქალაქო პარტნიორობის ლეგალიზაციის გადაჭრის გზებზე.
  • ზელენსკის თქმით, თანამედროვე მსოფლიოში დემოკრატიული საზოგადოების დონე მოქალაქეებისთვის თანაბარი უფლებების უზრუნველყოფით ისაზღვრება.

დეტალები: პრეზიდენტი განმარტავს, რომ უკრაინის 116-ე მუხლის შესაბამისად, მინისტრთა კაბინეტი იღებს ზომებს, რათა ხალხისა და მოქალაქეების უფლებები და თავისუფლებები უზრუნველყოს.

  • "ამის გათვალისწინებით, მივმართე უკრაინის პრემიერმინისტრს თხოვნით, გადახედოს ელექტრონულ პეტიციაში წამოყენებულ საკითხს და მაცნობოს შესაბამის შედეგებზე".

უკრაინული მედია სუსპილნე წერს, რომ ბოლო ექვსი წლის განმავლობაში უკრაინაში ლგბტ ადამიანების მიმართ ნეგატიური დამოკიდებულების რიცხვი 60,4%-დან 38,2%-მდე შემცირდა.

  • ოთხჯერ გაიზარდა ლგბტ თემის მიმართ დადებითად განწყობილთა რიცხვი — 3,3%-დან 12,8%-მდე.
  • ომის დროს ლგბტ თემის წევრები აქტიურად არიან ჩართული სამხედრო მოქმედებებში.