მთავარი პროკურატურა „რუსთავი 2“-ის გენერალური დირექტორის ნიკა გვარამიას მიერ გამართულ საგანგებო ბრიფინგს ეხმაურება და აცხადებს, რომ მის მიერ პროკურატურის მისამართით გაკეთებული განცხადება და მასში მოყვანილი ფაქტები არის სრული სიცრუე და არ შეესაბამება რეალობას.

"საზოგადოების სრულად ინფორმირების მიზნით, გვსურს ცალსახად განვაცხადოთ, რომ საქართველოს პროკურატურაში მოსამართლე ნათია გუჯაბიძის წინააღმდეგ არასდროს შემოსულა საჩივარ/განცხადება, მის მიმართ არ მიმდინარეობს გამოძიება და სისხლისსამართლებრივი დევნა".

პროკურატურის განცხადებით, რუსთავი 2-ის გენერალურმა დირექტორმა არასწორი და გადაუმოწმებელი ინფორმაცია გაავრცელა:

"დაინტერესებული მხარეები მიზნად ისახავენ საზოგადოების შეცდომაში შეყვანას და პროკურატურის დისკრედიტაციას. აქვე ხაზგასმით აღვნიშნავთ, რომ მიუხედავად მსგავსი უპასუხისმგებლო და გადაუმოწმებელი განცხადებისა, პროკურატურა არ და ვერ იქნება ჩაბმული ტელეკომპანია „რუსთავი 2“-თან დაკავშირებით კერძო სუბიექტებს შორის მიმდინარე სასამართლო დავაში".

რუსთავი 2-ის გენერალურმა დირექტორმა, ნიკა გვარამიამ საგანგებო ბრიფინგზე განაცხადა, რომ რამდენიმე საათის წინ ტელეკომპანიისთვის კონფიდენციალური წყაროსგან ცნობილი გახდა, რომ რუსთავი 2-ის საქმის ერთ-ერთი მოსამართლე, ნათია გუჯაბიძე თაღლითობაშია შემჩნეული და მის მიმართ პროკურატურა სწორედ ამ ბერკეტის გამოყენებით ახდენს ზეწოლას.