შექმნეს კვანტური კომპიუტერი, რომელიც ატომების სრულ დიაპაზონს იყენებს
![](http://monica.on.ge/2022/07/25/01.jpg)
ფოტო: metamorworks/iStock
ბოლო დროს კვანტური კომპიუტერების მხრივ ბევრი გარღვევა მოხდა, თითოეული მათგანი დარგში დიდ პროგრესს გვპირდება.
ახლა კი ავსტრიის ინსბრუკის უნივერსიტეტის ჯგუფმა შექმნა კვანტური კომპიუტერი, რომელიც სცილდება ორობით ინფორმაციას — ნულებს და ერთებს. ეს ხსნის დამატებით გამოთვლით საშუალებებს.
"კვანტური კომპიუტერების სამშენებლო ბლოკები უფრო მეტია, ვიდრე უბრალოდ ნულები და ერთები. მათი ორობითი სისტემებით შეზღუდვა ხელს უშლის ამ მოწყობილობებს რეალური პოტენციალის რეალიზებაში", — განმარტა მარტინ რინგბაუერმა, ექსპერიმენტატორმა ფიზიკოსმა ინსბრუკიდან.
მკვლევართა ჯგუფმა შეიმუშავა კვანტური კომპიუტერი, რომელსაც შეუძლია თვითნებური გამოთვლების შესრულება ე.წ. კვანტური ციფრებით (ქუდიტები), რითაც განბლოკავს მეტ გამოთვლით ძალას ნაკლები კვანტური ნაწილაკებით.
"ინსბრუკის კვანტურ კომპიუტერში ინფორმაცია ინახება ცალკეულ კალციუმის ატომებში. თითოეულ ამ ატომს ბუნებრივად აქვს რვა განსხვავებული მდგომარეობა, რომელთაგან, როგორც წესი, მხოლოდ ორი გამოიყენება ინფორმაციის შესანახად", — ნათქვამია განცხადებაში.
ატომების სრული პოტენციალის გამოყენება
კვანტური კომპიუტერის ინჟინერიით, რომელსაც შეუძლია გამოიყენოს ამ ატომების სრული პოტენციალი, ფიზიკოსებმა შექმნეს კომპიუტერი, რომელსაც შეუძლია ბევრად ეფექტიანი იყოს და ამავე დროს იყოს ისეთივე საიმედო, როგორც სხვები.
"კვანტურ სისტემებს ბუნებრივად აქვთ ორზე მეტი მდგომარეობა და ჩვენ ვაჩვენეთ, რომ მათ ყველას ერთნაირად კარგად ვაკონტროლებთ", — თქვა თომას მონცმა, ახალი კვლევის ავტორმა.
რაც ამ მიღწევას კიდევ უფრო მნიშვნელოვანს ხდის არის ის, რომ ბევრი ამოცანა, რომელიც საჭიროებს კვანტურ კომპიუტერებს, როგორიცაა გამოწვევები ფიზიკაში, ქიმიასა ან მატერიალურ მეცნიერებაში, ასევე ბუნებრივად არის გამოხატული ქვიდიტების ენაზე.
"ნულზე და ერთზე მეტთან მუშაობა ძალზე ბუნებრივია, არა მხოლოდ კვანტური კომპიუტერისთვის, არამედ მისი აპლიკაციებისთვისაც, რაც საშუალებას გვაძლევს გამოვიყენოთ კვანტური სისტემების ნამდვილი პოტენციალი", — განმარტავენ მკვლევრები.
კომენტარები