ტელეკომპანია რუსთავი 2-ის გენერალური დირექტორი, ნიკა გვარამია, On.ge-სთან ინტერვიუში აცხადებს, რომ რამდენიმე ტელეარხმა ერთად მიმართა გადახვევის ფუნქციის მქონე ოპერატორებს რეტრანსლირების საფასურის მოთხოვნით და ეს კომერციული ინტერესიდან გამომდინარე გააკეთეს:

"ჩვენ დიდი ხნის წინ უნდა გაგვეკეთებინა ეს, რადგან ოპერატორები, რომლებსაც აქვთ გადახვევის სერვისი, ჩვეულებრივ ყიდიან ჩვენს პროდუქციას, ჩვენი პროდუქციით აკეთებენ ფულს და ბუნებრივია, აქედან სარგებელი ჩვენც უნდა ვნახოთ. ეს არის მსოფლიოში აპრობირებული მეთოდი, ყველა ასე მუშაობს. თუ სილქნეტი რეტრანსლირების საფასურს უხდის უცხოურ არხებს და მათ შორის, რუსულ არხებს, რატომ არ უნდა გადაგვიხადოს ჩვენ? მათ თუ სურთ თავიანთი სერვისის ამჟამინდელი ფასის შენარჩუნება, ან მოგების მარჟა უნდა შეამცირონ, ან პაკეტში არხების რაოდენობა".

როგორც გვარამია ამბობს, ბაზრის მსხვილმა მოთამაშეებმა გადაწყვიტეს ერთობლივად ემოქმედათ და ესეც მუშაობის მიღებული ფორმაა. კითხვაზე, მათ მიმართეს თუ არა სხვა საკაბელო ოპერატორებს რეტრანსლირების საფასურის გაზრდის მოთხოვნით, გვარამია პასუხობს, რომ ეს ამ ეტაპზე მხოლოდ გადახვევის სერვისის მქონე კომპანიებისგან მოითხოვეს და მათი მოთხოვნა სხვებს არ ეხება.

კომპანია სილქნეტმა აბონენტებს 15 მაისს შეტყობინება გაუგზავნა, სადაც ნათქვამია, რომ რუსთავი 2, მაესტრო და იმედი "აბონენტებისთვის საზიანოდ" შეთანხმდნენ, ფასიანი გახადონ მათი არხების ჩვენება, რამაც შეიძლება გააძვიროს პაკეტის ღირებულება.

რუსთავი 2-მა, იმედმა, GDS-მა, მარაომ, მაესტრომ და კომედი არხმა თავიანთი პროდუქციის რეტრანსლირების უფლება გადასცეს შპს მედია რაითს ჯორჯიას. სწორედ ამ კომპანიამ მოითხოვა სილქნეტისა და სხვა კომპანიებისგან რეტრანსლირების საფასურის გადახდა. მედია რაითს ჯორჯია 2017 წლის 26 აპრილს დარეგისტრირდა და მისი 25-პროცენტიანი წილები ეკუთვნის ოთხ პირს და ესენია:

  • ზურაბ ნაყეური;
  • გიორგი სულაძე;
  • დიმიტრი ბოკერია;
  • მანანა გეგელაშვილი.