კინოთეატრების ბრიტანული ქსელი Showcase ზაფხულის ცხელ დღეებში წითურთმიანებს სეანსებზე უფასოდ დაუშვებს. კომპანიის განცხადებით, 18 და 19 ივლისს — მაშინ, როცა გაერთიანებულ სამეფოში 40 გრადუს ცელსიუსზე მაღალი ტემპერატურაა მოსალოდნელი — წითურთმიანი ადამიანები ბილეთებს საჩუქრად მიიღებენ.

ამის მიზეზი ისაა, რომ წითურთმიანები მზისა და მაღალი ტემპერატურის მიმართ მომატებული მგრძნობელობით გამოირჩევიან. ასე რომ, ცხელი დღეების გადატანას ისინი კინოთეატრების გრილ დარბაზებში ფილმების ყურებით შეძლებენ.

"იმის მიუხედავად, რომ ბრიტანეთში ესოდენ საჭირო მზიანი ამინდები გვიდგას, ვიცით, რამდენად რთულია ასეთი სიცხე ზოგიერთისთვის", — ამბობს Showcase-ის გენერალური მენეჯერი, მარკ ბარლოუ, — "ამიტომ, სიცხის შესამსუბუქებლად, წითურთმიანებს ჩვენს კინოთეატრებში სეანსებზე უფასოდ დასწრებას ვთავაზობთ. გრილ დარბაზებში ისინი კომფორტულად შეძლებენ შესანიშნავი ფილმების ყურებასა და მზისგან თავდაცვას".

როგორც ცნობილია, თითო წითურთმიანზე ყოველდღე თითო ბილეთი გაიცემა.

ცოტა ხნის წინ გაერთიანებულ სამეფოში რეკორდულად მაღალი ტემპერატურა, 40,2 გრადუსი ცელსიუსი დაფიქსირდა. გაუგონარი სიცხეებია ევროპის სხვა ქვეყნებშიც, მათ შორის, საფრანგეთსა და ესპანეთში. მაღალმა ტემპერატურამ კონტინენტის რამდენიმე რეგიონში ხანძრებიც გამოიწვია.

ასევე იხილეთ: