კონცერტის დროს ფანებთან ურთიერთობა ჰარი სტაილსისთვის უცხო ნამდვილად არაა. მსმენელები ჰარის კონცერტზე ხშირად ბანერებით მიდიან — ესალმებიან, ეხუმრებიან ან მნიშვნელოვან ცხოვრებისეულ მომენტებს მასთან ერთად ზეიმობენ. ჰარიც მუდამ მზადაა, ფანებს თხოვნები შეუსრულოს.

ერთ-ერთი ჟესტი, რომლითაც ჰარიმ ფანების სიყვარული კიდევ ერთხელ მოიპოვა, მათთვის დაქამინგაუთებაში დახმარებაა. ცოტა ხნის წინ ლონდონში, უემბლის სტადიონზე გამართული კონცერტის დროს ჰარიმ ფანის ბანერი შენიშნა, რომელზეც ეწერა: "ონო უემბლის: დაქამინგაუთებაში დამეხმარე".

ჰარიმ ფანს ბანერი გამოართვა და ის დამსწრე საზოგადოებას ანახა. "ანუ გინდა, რომ უემბლიზე შეკრებილი ხალხი დაქამინგაუთებაში დაგეხმაროს?" — ჰკითხა მან ფანს, რომლისგანაც დასტური მალევე მიიღო.

ჰარიმ სცენიდან ცისარტყელის დროშა აიღო და ფანს "წესები" აუხსნა: "როგორც კი ამ დროშას ავწევ, ოფიციალურად გეი ხარ, ჩემო ბიჭო. მგონი, ასეთი წესია". ამის შემდეგ ხალხს მოუწოდა, ეხმაურათ და რამდენჯერმე მოიტყუა, თითქოს დროშას სწევდა, სიტყვებით "არა, ჯერ კიდევ ჰეტეროსექსუალი ხარ". ბოლოს დროშა ასწია და ფანებმაც კივილი დაიწყეს.

"გილოცავ, თავისუფალი ხარ", — ასე მიულოცა ჰარიმ ერთგულ ფანს დაქამინგაუთება.

2021 წელს ჰარი ერთ-ერთ ფანს დედასთან დაქამინგაუთებაში დაეხმარა. გულშემატკივარს ხელში ბანერი ეკავა წარწერით "დედაჩემი 201-ე სექციაში ზის, დაქამინგაუთებაში დამეხმარები?". მომღერალი წარწერის წასაკითხად შეჩერდა და დახმარება გადაწყვიტა. მალევე ფანის დედას მიაგნო და ხმამაღლა განაცხადა: "ლისა! ის გეია!"

ამავე თემაზე: