ლუგანსკის სამხედრო ადმინისტრაციის ხელმძღვანელის, სერგეი გაიდაის განცხადებით, სევეროდონეცკის აზოტის ქარხანაში 568 ადამიანი, მათ შორის, 38 ბავშვია. უმეტესობა, ვინც თავშესაფარშია, ქარხნის თანამშრომლები, მათი ოჯახის წევრები და ადგილობრივი მაცხოვრებლები არიან.

რატომ არის მნიშვნელოვანი: სევეროდონეცკის სამხედრო ადმინისტრაციის ხელმძღვანელმა CNN-ს განუცხადა, რომ ამ ეტაპზე სურსათის მარაგი აქვთ, თუმცა მიწოდება ორი კვირის განმავლობაში არ მომხდარა.

  • სამივე მთავარი ხიდი სევეროდონეცკსა და მეზობელ ლისიჩანსკს შორის განადგურებულია. ევაკუაცია და ჰუმანიტარული დახმარების მიწოდება შეუძლებელია.
  • სამი მხრიდან რუსული ჯარების ალყაა, მეოთხე მხრიდან კი აზოვის ზღვა.
  • ქარხნის ტერიტორია მუდმივად იბომბება.

გაიდაის თქმით, ხელისუფლება ცდილობდა დაერწმუნებინა მშვიდობიანი მოქალაქეები, დაეტოვებინათ ქარხანა გასულ თვეში, სანამ ევაკუაცია გაცილებით მარტივი იყო.

  • თუმცა იქ მყოფთა უმეტესობა ფიქრობდა, რომ ქარხანაში ბევრად უფრო უსაფრთხოდ იქნებოდნენ.
  • "გარეთ გამოსვლის შემთხვევაში, სიკვდილის შანსი 99%-ია".

რა ხდება სევეროდონეცკში: მას შემდეგ, რაც რუსეთმა ომის მეორე ფაზა დაიწყო, ძალების მობილიზებას ვლადიმერ პუტინი სწორედ ლუგანსკის ოლქის ადმინისტრაციულ ცენტრში ცდილობს.

  • ბოლო რამდენიმე კვირაა სევეროდონეცკი უწყვეტად იბომბება. ქალაქში მძიმე ბრძოლები მიმდინარეობს.
  • დღეს, 16 ივნისს ცნობილი გახდა, რომ ოკუპანტებმა დაბომბეს შენობა, სადაც მშვიდობიანი მოსახლეობა აფარებდა თავს — დაიღუპა 3 და დაშავდა 7 ადამიანი.

რუსეთს წარუმატებლობის შემდეგ, სევეროდონეცკის დაკავება იმ სიმბოლურ გამარჯვებას მოუტანს, რომელსაც აქამდე ვერ მიაღწია.

  • აღმოსავლეთ უკრაინაზე კონტროლის დამყარება ოკუპანტებს საშუალებას მისცემს ყირიმის მიმართულებით სახმელეთო დერეფანი შექმნან.

არქივიდან: 22 აპრილს რუსეთმა ომის მეორე ფაზის მიზნები დაასახელა.

  • ოკუპანტების ერთ-ერთი მთავარი ამოცანაა, სრულად დაამყარონ კონტროლი დონბასზე;
  • მეორე ეტაპი, ასევე, მოიცავს სამხრეთ უკრაინაზე კონტროლის დამყარებას, რაც უწყების განცხადებით, კიდევ ერთი გზა იქნება დნესტრისპირეთისკენ.