იცით თუ არა, რა ასაკიდან უნდა მიიღოს ბავშვმა მაწონი?

ბავშვთა კვებაში რძისა და მის პროდუქტებზე რეკომენდაცია ერთი წლიდან გაიცემა, თუმცა, პედიატრთა ნაწილი, რძისგან განსხვავებით, მაწონს რეკომენდაციას 8 თვიდან უწევს.

მაწონი ტრადიციული, კავკასიური რძემჟავა პროდუქტია. სხვანაირად მას ენდემურ პროდუქტსაც უწოდებენ. "საიდუმლო" მიზეზი, რომელიც ჩვენს, განსაკუთრებით კი ბავშვების ჯანმრთელობას განაპირობებს, სწორედ ენდემურ დედოშია.

მაწვნის დედო მაწონს მსუბუქ მომჟავო გემოს აძლევს. ეს რძემჟავა პროდუქტები განსაკუთრებით სასარგებლოა მათში შემავალი ბაქტერიების პრობიოტიკების გამო. აღმოჩნდა, რომ ყველა ბაქტერია სულაც არაა მავნებელი — პირიქით პრობიოტიკებს სხვაგვარად მეგობარ ბაქტერიებსაც უწოდებენ. ისინი ცოცხალი მიკროორგანიზმებია, რომლებიც დადებით გავლენას ახდენენ კუჭ-ნაწლავის ფუნქციონირებაზე და აძლიერებენ საჭმლის მომნელებელ სისტემას.

კეთილი პრობიოტიკები, ორგანიზმში მოხვედრილ სხვა ცუდ ბაქტერიებსაც ეფექტურად ებრძვიან. ისინი ერთგვარი ბარიერის ეფექტს ქმნიან და ასე იცავენ ნაწლავებს ცუდი ბაქტერიების ზემოქმედებისგან. შესაბამისად ამცირებენ ანთების განვითარების რისკს და ხელს უშლიან ორგანიზმში პარაზიტების გავრცელებას. შეიძლება ითქვას, რომ პრობიოტიკების წყალობით ბავშვის იმუნური სისტემაც ვირუსების წინააღმდეგ გაცილებით მდგრადი ხდება.

რადგან პატარები ხშირად უარს ამბობენ რძემჟავა პროდუქტის მიღებაზე, დედებს უამრავი ხრიკის მოფიქრება უწევთ.

პედიატრი თამარ ობგაიძე მათ გემრიელ და სასარგებლო რეცეპტს სთავაზობს.

საჭირო მასალა ცომისათვის:

• 5-6%-იანი ხაჭო 180 გრამი
• ფქვილი — დაახლოებით, 30 გრამი
• 1 კვერცხის გული
• 1 პაკეტი ვანილი
• შაქრის პუდრა — დაახლოებით, 5-10 გრამი
• კარაქი საცხობი ფორმისათვის — 10 გრამი

მოზრდილი ასაკის ბავშვებისთვის შეგიძლიათ დაამატოთ მწიკვი მარილი და 20 გრამი შაქრის პუდრა.

სოუსისათვის:

• მაწონი 50-100 მლ
• 1/2 ბანანი

მომზადება:

1. თასში ერთმანეთს შეურიეთ ხაჭო, კვერცხის გული, ვანილი, დაუმატეთ გაცრილი პურის ფქვილი ისე, რომ ნაზი ცომი მოიზილოს.
2. ცომს მიეცით ძეხვის ფორმა და დაჭერით დაახლოებით 3-4 სანტიმეტრის რგოლებად. რგოლები ოდნავ გააბრტყელეთ და დაამრგვალეთ.
3. საცხობ ფორმას წაუსვით ცოტა კარაქი. დაალაგეთ მაჭკატები, ზემოდან გადაუსვით მდნარი კარაქის მცირე რაოდენობა ოქროსფერი ქერქის მისაღებად.
4. გამოაცხვეთ ღუმელში 180 გრადუსზე 15-20 წუთის განმავლობაში. შეგიძლიათ გამოაცხოთ ტაფაზეც.
5. გაგრილებულ მაჭკატებს მოაყარეთ შაქრის პუდრა.
6. სოუსისათვის ბლენდერით შეურიეთ ერთმანეთს მაწონი და ბანანი.

ეს კერძი პრაქტიკულად სუპერპროდუქტების ნარევია, რომელშიც ვიტამინების გარდა არის ბევრი კალციუმი, ფოსფორი, ასევე შეიცავს მეგობარ ბაქტერიებს, რაც მნიშვნელოვანია ბავშვის ნაწლავის მიკრობიოტას ფორმისებისა და ნაწლავების მოტორიკის გაუმჯობესებისათვის.