ოკუპირებული ცხინვალის რეგიონი ამტკიცებს, რომ საქართველოს ყაზბეგი ოკუპირებული აქვს და რეალურად ეს მუნიციპალიტეტი მათია. დე ფაქტო საგარეო საქმეთა სამინისტრომ ამაზე ისაუბრა განცხადებაში, რომლითაც გაეროს რეზოლუცია საქართველოს ოკუპირებული ტერიტორიებიდან დევნილთა შინ დაბრუნების შესახებ დაგმო.

მათი მტკიცებით, საქართველომ რეალურად ძველი "ოსური მიწების" — ყაზბეგის რეგიონის ოკუპაცია მოახდინა, სადაც მათი თქმით, ადამიანის უფლებები მასიურად ირღვევა და ამ ტერიტორიიდან "გამოდევნილ" ოს მოსახლეობას საკუთარ სახლებში ჩასვლა, წინაპრების საფლავებზე მისვლა ეკრძალებათ, ამაზე კი საქართველოს ხელისუფლება და მისი დასავლელი მეგობრები გაეროში არ საუბრობენ.

დე ფაქტო უწყების მტკიცებით, ასეთი რეზოლუციის მიღება გაეროში, სადაც ოკუპირებული ცხინვალი და აფხაზეთი წარმოდგენილი არ არიან, ობიექტურობას მოკლებულია.