უკრაინის პრეზიდენტის ადმინისტრაციის უფროსის მრჩევლმა, მიხაილო პოდოლიაკმა ქართული ოცნების ლიდერებზე განაცხადა, რომ როდესაც ეს სუბიექტები ქუჩურად საუბრობენ, ამის წაკითხვა აუცილებელი არაა.

ფორმულასთან ინტერვიუში წამყვანმა მას დაუსვა კითხვა, ეცნობა თუ არა მმართველი პარტიის წარმომადგენლების განცხადებებს, მათ შორის, კახა კალაძის კომენტარს, რაზეც პოდოლიაკმა თქვა, რომ შეუძლიათ ისაუბრონ, თუმცა როცა ომი დასრულდება, საერთაშორისო პლატფორმებზე ისინი ერთმანეთს დაუსვამენ კითხვებს.

"რაში მჭირდება ეს. არსებობს ასეთი ცნება — მაღალკულტურული ინტელექტუალური ადამიანი. როდესაც ეს სუბიექტები ქუჩურად ლაპარაკობენ, ამის წაკითხვა არ არის აუცილებელი. მე არ ვიცი, როგორ აძლევთ თქვენ ხმას ასეთ ადამიანებს, რომლებიც ამ ტონით ლაპარაკობენ. ეს თქვენი შიდა არჩევანია. თქვენ, შეიძლება, აირჩიოთ ისინი, რომლებიც ნაკლებად განათლებული ადამიანების სტილში საუბრობენ. თუ თქვენ მოგწონთ, პრობლემა არა. მომხრე ვარ ორივე ხელით. ეს თქვენი შიდა პოლიტიკაა.

შეუძლიათ ილაპარაკონ, მაგრამ როცა ომი დასრულდება, საერთაშორისო პლატფორმებზე ჩვენ ერთმანეთს დავუსვამთ კითხვებს: თქვენ ხომ ასე ლაპარაკობდით, ხომ მაგარი ბიჭები ხართ, მაშინ აგვიხსენით, ასე რატომ მოქმედებდით? მერე ვისაუბრებთ. ახლა აქ ადამიანებს ხოცავენ და იძულებული ვარ ვუსმინო იმ ადამიანებს, რომელთაც არ შეუძლიათ საკუთარი აზრების არგუმენტირება მოახდინონ?", — განაცხადა პოდოლიაკმა ფორმულასთან ინტერვიუში.

4 მაისს თბილისის მერმა, კახა კალაძემ, უკრაინის პრეზიდენტის ადმინისტრაციის მრჩეველს "არსება უწოდა" და ჟურნალისტებს "თხოვა" ნახონ, ვინ არის მიხაილო პოდოლიაკი და "რა ცხოვრებით უცხოვრია".