ცოტა ხნის წინ ვირჯინიის სასამართლომ ბოლო დროის ყველაზე გახმაურებულ საქმეზე გადაწყვეტილება გამოიტანა: ამბერ ჰერდის წინააღმდეგ ჯონი დეპის სარჩელი დაკმაყოფილდა. ნაფიც მსაჯულებმა დაადგინეს, რომ ამბერ ჰერდმა ყოფილ ქმარს 2018 წელს გამოქვეყნებულ ოპ-ედში ცილი დასწამა.

გავრცელებული ინფორმაციით, დავა შესაძლოა ამით არ დასრულდეს, რადგან ამბერ ჰერდი სასამართლოს გადაწყვეტილების გასაჩივრებას აპირებს. ამის შესახებ ჰერდის წარმომადგენელმა The New York Times-ს განუცხადა.

სასამართლოს გადაწყვეტილებით, ჯონი დეპი ზიანის ანაზღაურების სახით $15 მილიონს მიიღებს, ამბერ ჰერდი კი $2 მილიონს. აღსანიშნავია, რომ სასამართლომ ერთ ნაწილში ამბერ ჰერდის მოთხოვნაც დააკმაყოფილა: აქვამენის მსახიობი აცხადებდა, რომ მას ჯონი დეპის აგენტმა ცილი დასწამა და #MeToo ეპოქაში "ძალადობის ცრუ ბრალმდებელი" უწოდა.

ამბერ ჰერდმა სასამართლოს გადაწყვეტილებით გამოწვეული იმედგაცრუება საზოგადოებას სოციალურ ქსელებში გაუზიარა:

"სიტყვებით ვერ აღვწერ იმ იმედგაცრუებას, რომელსაც დღეს ვგრძნობ. გულგატეხილი ვარ, რომ ზღვა მტკიცებულებაც კი არ იყო საკმარისი, რომ ჩემი ყოფილი ქმრის არაპროპორციულად დიდ ძალაუფლებას, გავლენასა და ავტორიტეტს დავპირისპირებოდი.

კიდევ უფრო იმედგაცრუებული ვარ იმის გამო, თუ რას მოუტანს ეს სხვა ქალებს. ეს უკან გადადგმული ნაბიჯია. ეს იმ დროში დაბრუნებაა, სადაც ქალებს ხმის ხმამაღლა ამოღების გამო საჯაროდ არცხვენდნენ და ამცირებდნენ. ეს ხელს უშლის იმ იდეას, რომ ქალების მიმართ ძალადობა სერიოზულად უნდა იყოს აღქმული", — განაცხადა ამბერ ჰერდმა.

სასამართლოს გადაწყვეტილებას ჯონი დეპიც გამოეხმაურა:

"თავიდანვე ამ სარჩელის მიზანი იყო, რომ სიმართლე გამოვლენილიყო, მიუხედავად იმისა, თუ როგორი იქნებოდა საბოლოო შედეგი. ვალდებული ვიყავი, სიმართლე სცოდნოდათ ჩემს შვილებს და ყველას, ვისაც ურყევად სჯეროდა ჩემი. ახლა უკვე ვიცი, რომ ამას მივაღწიე", — განაცხადა ჯონი დეპმა.

ჯონი დეპმა ყოფილ ცოლს, ამბერ ჰერდს ცილისწამებისთვის უჩივლა და ზიანის ასანაზღაურებლად $50 მილიონი მოითხოვა. ჰერდმა 2018 წელს The Washington Post-ში გამოაქვეყნა ოპ-ედი, სადაც განაცხადა, რომ ოჯახში ძალადობის მსხვერპლი იყო. ამბერს ტექსტში ყოფილი ქმრის სახელი არ უხსენებია, თუმცა დეპის სარჩელში აღნიშნულია, რომ ოპ-ედი სწორედ მას ეხებოდა, რის გამოც მისი კარიერა დაზიანდა და როლები დაკარგა.

ამავე თემაზე: