რუსეთის საგარეო საქმეთა მინისტრის, სერგეი ლავროვის განცხადებით, უკრაინის პორტებს იმ შემთხვევაში განბლოკავენ თუ უკრაინა სანაპიროს განაღმავს.

"მნიშვნელოვანია, რომ უკრაინის წარმომადგენლებმა გაასუფთაონ სანაპირო ნაღმებისგან. თუ ეს პრობლემა მოგვარდება, მაშინ რუსეთის საზღვაო ძალები უზრუნველყოფენ ამ გემების შეუფერხებელ გადაადგილებას ხმელთაშუა ზღვაში და შემდგომ დანიშნულების ადგილამდე", — ამბობს ის.

პარასკევს უკრაინის პრეზიდენტმა, ვოლოდიმირ ზელენსკიმ განაცხადა, რომ 22 მილიონი ტონა მარცვლეულის ექსპორტი რუსეთის მიერ შავი და აზოვის ზღვების გავლით ძირითადი საექსპორტო გზების ბლოკადის გამო შეჩერებულია.

კრემლი ბრალდებებს უარყოფს და პორტის ბლოკადას უკრაინას აბრალებს. გუშინ რუსეთის პრეზიდენტმა, ვლადიმერ პუტინმა თურქეთის პრეზიდენტ რეჯეფ თაიფ ერდოღანს განუცხადა, რომ მოსკოვი მხარს დაუჭერს უკრაინული მარცვლეულის "შეუფერხებელ" ექსპორტს უკრაინის პორტებიდან.