სპეციალური პენიტენციური სამსახურის განცხადებით, მიხეილ სააკაშვილის ჩატარებული გამოკვლევების შედეგად, "გონების დაკარგვის ობიექტური, სამედიცინო მტკიცებულებები" ამ ეტაპზე გამოვლენილი არ იქნა. ასე ეხმაურება უწყება ადვოკატის მიერ გავრცელებულ ინფორმაციას, რომ ექსპრეზიდენტმა გონება დაკარგა.

"სამედიცინო დაწესებულებიდან მიღებული ინფორმაციის თანახმად, მიმდინარე წლის 25 მაისს 01:31 სთ-ზე მ. სააკაშვილთან გამოძახებულ იყო მორიგე ექიმი, რომელსაც პატიმარმა განუცხადა, რომ გახდა შეუძლოდ — "დაკარგა გონება".

სააკაშვილს სხეულის გარეგანი დაზიანებები არ აღენიშნებოდა, ჰემოდინამიკური და სხვა ვიტალური პარამეტრები (არტერიული წნევა, პულსი, სუნთქვის სიხშირე, სხეულის ტემპერატურა, პულსოქსიმეტრია), შაქრის დონე სისხლში, ეკგ მაჩვენებლები — ნორმის ფარგლებშია. დამატებით კონსულტირებული იყო ნევროლოგის მიერ — მწვავე ნევროლოგიური პათოლოგია გამოირიცხა.

ჩატარებული კვლევების საფუძველზე, გონების დაკარგვის ობიექტური, სამედიცინო მტკიცებულებები ამ ეტაპზე არ იქნა გამოვლენილი, ჯანმრთელობის საერთო მდგომარეობა შეფასდა, როგორც დამაკმაყოფილებელი, კვლევების შემდგომი გაღრმავება და მკურნალობის კორეგირება მიზანშეწონილად არ იქნა მიჩნეული. გრძელდება დაკვირვება დინამიკაში",— აღნიშნულია განცხადებაში.

მათი თქმით, სააკაშვილის ჯანმრთელობის მდგომარეობა დღის განმავლობაში იყო კვლავ სტაბილური, ჩაუტარდა გეგმიური კვლევებიც და მკურნალი ექიმის ნებართვის საფუძველზე ოთხმა ვიზიტორმა მოინახულა.

მიხეილ სააკაშვილის ადვოკატმა, დიმიტრი საძაგლიშვილმა 25 მაისს განაცხადა, რომ ექსპრეზიდენტმა გვიან ღამით გონება დაკარგა. მანამდე სააკაშვილმა მის ჯანმრთელობის მდგომარეობაზე დაწერა და აღნიშნა, რომ ხერხემალზე ტრავმა დაუდგინდა. მისი შეფასებით, ეს დაზიანება გლდანში ძალის გამოყენებით გადაყვანისას მიიღო.

სააკაშვილი ამ დროისთვის ვივამედში იმყოფება, ოჯახი მის საზღვარგარეთ გადაყვანას ითხოვს. ასევე ადვოკატები ამბობენ, რომ ელოდებიან ექსპერტების დაშვება. გუშინ, 24 აისს კლინიკა ვივამედმა ექსპრეზიდენტ მიხეილ სააკაშვილის ჯანმრთელობის შესახებ განცხადება გამოაქვეყნა, რომელშიც ნათქვამია, რომ სტაციონარში ყოფნის პერიოდში, მისი ჯანმრთელობის მდგომარეობა არ გაუარესებულა.