სკოლებში, საპირფარეშოს ჰიგიენის ნორმებისა და სხვა დარღვევების გამო, სამი დირექტორი გაათავისუფლეს, სამს გაფრთხილება, ერთს კი მითითება მისცეს. ამის შესახებ განათლების სამინისტრომ On.ge-ის დაუდასტურა ინფორმაცია. პრესსამსახურის ცნობით, სკოლებში მონიტორინგის სამსახურისა და შიდა აუდიტის დეპარტამენტის შემოწმების შედეგად გამოვლინდა დარღვევები, მათ შორის სანიტარულ-ჰიგიენური:

"რიგ სკოლებში, სხვა დარღვევებთან ერთად, გამოვლინდა სველ წერტილებთან, კერძოდ, საპირფარეშოს ჰიგიენასთან დაკავშირებული პრობლემები. გათავისუფლდა თბილისის 151-ე, 23-ე და სამტრედიის მე-4 სკოლის დირექტორები. საპირფარეშოების ჰიგიენასთან დაკავშირებით გაფრთხილება მისცეს მარნეულის მე-3, მარნეულის სოფელ ჯანდარის და ყაზბეგის სოფელ არშის სკოლებს, მითითება მისცეს მარნეულის სოფელ წერეთლის სკოლას".