ევროპარლამენტარის, მარინა კალიურანდის განცხადებით, ყველა პოლიტიკოსი უნდა დადგეს პარტიულ ინტერესებზე მაღლა და ეროვნული ინტერესები უნდა დააყენონ პირველ ადგილას. მან ურჩია ქართულ ოცნებას, მოუსმინონ მეგობრებს. ამის შესახებ მან TV პირველის ეთერში ისაუბრა.

""ცოტა ვერ გავიგე, მე ვარ კრიმინალი? თუ ვინ ვარ? რას ნიშნავს კრიმინალების მფარველი. პოლიტიკოსები საკუთარ განცხადებაში თავისუფლები ვართ. მაგრამ თუ კრიტიკა მოდის ევროპარლამენტიდან და პარტნიორებიდან, რომლებიც რეალურად ზრუნავენ საქართველოს მომავალზე, ქართველ ხალხზე, რეფორმებზე. ჩემი რჩევა იქნება, რომ მიიღოთ ჩვენი კრიტიკა სერიოზულად. ევროპარლამენტარებს გვაქვს უფლება, რომ გამოვხატოთ ჩვენი მოსაზრება, შთაბეჭდილება. ჩემი რჩევა იქნება, რომ უსმინოთ მეგობრებს და მეგობრულ რჩევას, ასევე სერიოზულად.

საქართველო ძალიან კრიტიკულ პერიოდშია — ომი უკრაინაში, წევრობის განაცხადი, ევროკომისიის დასკვნა ახლოვდება, ეს ყველაფერი ძალიან კრიტიკული ასპექტებია. ჩემი რჩევა მიემართება ყველა ქართველ პოლიტიკოსს, რომ იყვნენ ერთად. დადგნენ პარტიულ ინტერესებზე მაღლა და ეროვნული ინტერესი დააყენონ პირველ ადგილას. დაივიწყეთ პოლარიზაცია, თქვენ მუშაობთ მომავალზე და თქვენი ქვეყნის მომავალი დამოკიდებულია იმაზე, მიიღებთ თუ არა ევროკავშირის სტატუსს", — ამბობს ის. [TV პირველის თარგმანი]

გუშინ კობახიძემ დასავლელი პარტნიორების კრიტიკას კვლავ კრიტიკით პასუხობს და თქვა, რომ ნაციონალური მოძრაობა, "კრამონები და ფოტიგები" არიან ანტიევროკავშირი.

18 მაისს, კულტურის მინისტრმა, თეა წულუკიანმა იმედის ეთერში საუბრისას განსაკუთრებული ყურადღება დაუთმო აშშ-ის ყოფილ ელჩს, იან კელისა და ევროპარლამენტარებს, ვიოლა ფონ კრამონსა და ანა ფოტიგას. ის ამტკიცებდა, რომ იან კელის საქართველო არ უყვარს, კრამონს კი სხვა საქმე არ აქვს.

წულუკიანის ამ განცხადებებს კრამონი გამოეხმაურა და თქვა, რომ ქართული ოცნების დეზინფორმაცია აღწევს კრემლის დონემდე.