ზებუნებრივ არსებებზე მონადირეები ქალაქში ბრუნდებიან!

Supernatural, რომელიც საშინელებათა ჟანრის ერთ-ერთი ყველაზე ცნობილი ამერიკული სერიალია, 15 სეზონის შემდეგ 2020 წელს დასრულდა. თუმცა, მალევე გავიგეთ, რომ ძმები ვინჩესტერების მშობლების შესახებ სერიალზე, ანუ ზებუნებრივის წინაისტორიაზე მუშაობა დაიწყო. ამჯერად, უკვე სერიალის გამოსვლის დროც ვიცით და ტრეილერის ნახვის შესაძლებლობაც გვაქვს. ახალ სერიალს, სახელწოდებით The Winchesters (ვინჩესტერები), მაყურებელი შემოდგომაზე იხილავს.

სერიალის ტრეილერში მთხრობელად დინ ვინჩესტერი (ჯენსენ ეკლსი) გვევლინება, რომელიც ამბის მოყოლას 1972 წლიდან იწყებს. მისი თქმით, ვინჩესტერების ოჯახის ისტორია ყოველთვის საიდუმლოებით იყო მოცული, ამიტომ მის გასარკვევად საჭიროა, დროში უკან დაბრუნდეს — მაშინ, როცა მამამისი ჯონ ვინჩესტერი ომიდან დაბრუნდა და დედამისს, მერი კემპბელს, შეხვდა.

ტრეილერში ვხედავთ, რომ დემონის ხელში აღმოჩენილ ჯონს მერი დაიხსნის. მოგვიანებით, წყვილი გადაწყვეტს, თავიანთი ოჯახების ტრადიციას მიჰყვნენ და ზებუნებრივ არსებებზე ნადირობა დაიწყონ.

ვინჩესტერებში მთავარ როლებს მეგ დონელი და დრეიკ როჯერი ასრულებენ. ამასთან, დინის როლში ეკლსს ისევ ვიხილავთ, თუმცა, იგი პროექტის აღმასრულებელი პროდიუსერიც იქნება.

ზებუნებრივი მაყურებელმა პირველად 2005 წელს იხილა და მას შემდეგ ის უამრავი ადამიანის საყვარელ სერიალად იქცა. 15 სეზონთან და 327 სერიასთან ერთად, ზებუნებრივმა რამდენიმე კომპანიონი, "სპინ-ოფ", სერიალიც მოიცვა. ვინჩესტერებიც ერთ-ერთი მათგანია.