საიენტოლოგია, რომელიც ჯერ მხოლოდ ათწლეულებია, რაც ეკლესიის სახით არსებობს, ერთ-ერთი ყველაზე განხილვადი რელიგიაა. სამთავრობო სტრუქტურებისა და მკვლევრების ნაწილი ეკლესიას მანიპულაციურ და ანგარებიან ბიზნესად მიიჩნევს. მაგალითად, გერმანიის მთავრობა საიენტოლოგიას ანტიკონსტიტუციურ სექტად თვლის, საფრანგეთში კი ამ რწმენას საშიში კულტის სახელი აქვს. ამის მიუხედავად, ორგანიზაციის წევრი არაერთი ცნობილი ადამიანი ყოფილა — ზოგიერთი მათგანი კი დღემდეა.

1. ელიზაბეთ მოსი

მსახიობი, რომელიც ყველაზე მეტად სერიალ მხევლის წიგნში შესრულებული როლით არის ცნობილი, საიენტოლოგიის მიმდევარი ჯერ კიდევ მოზარდობამდე გახდა. თუმცა, მოსი ამ თემაზე ღიად დიდად არ საუბრობს. The New Yorker-ისთვის მიცემულ ინტერვიუში მან აღნიშნა, რომ საიენტოლოგიას ხშირად არასწორად იგებენ.

"სულაც არაა 'ჩაკეტილი' რელიგია", — ამბობს მსახიობი, — "ეს ადგილი ყველასთვის ღია და კეთილგანწყობილია, ვისაც მის შესახებ მეტის გაგება სურს".

2. ტომ კრუზი

ტომ კრუზი ერთ-ერთი ყველაზე ცნობილი საიენტოლოგია ჰოლივუდში. თავის ინტერვიუებში წინათ იგი ხშირად გამოდიოდა ეკლესიის დასაცავად, ერთხელ კი ფსიქიატრიას "ფსევდომეცნიერებაც" კი უწოდა. მსახიობი სეთ როგანი თავის მემუარში იხსენებს, რომ როცა ის და ჯუდ აპეტოუ კრუზს ახალ პროექტზე სალაპარაკოდ შეხვდნენ, ტომმა მათთან თავის ეკლესიასთან შეერთებაზე სცადა საუბარი.

3. ნიკოლ კიდმანი

კიდმანი საიენტოლოგიის ეკლესიის წევრი კრუზის გამო იყო. მას შემდეგ, რაც წყვილმა ერთად ცხოვრება შეწყვიტა, კიდმანიც ჩამოშორდა ყოფილი ქმრის რელიგიას. თუმცა, ნიკოლისა და ტომის შვილები ეკლესიის წევრებად დარჩნენ, რის გამოც დედასთან ურთიერთობაზეც თქვეს უარი — საიენტოლოგიის მიმდევრები, როგორც წესი, არ ამყარებენ ემოციური კავშირს იმ ადამიანებთან, რომლებიც მათ მრწამსს არ აღიარებენ.

• ნიკოლ კიდმანი დუმილს არღვევს და საიენტოლოგ შვილებზე კომენტარს აკეთებს

4. ჯონ ტრავოლტა

2009 წელს გავრცელდა ინფორმაცია, რომ ამერიკელი მსახიობი საიენტოლოგიის ეკლესიას დატოვებდა, თუმცა, იგი რელიგიის მიმდევრად რჩება. ტრავოლტას საიენტოლოგია 1975 წელს ფილმ The Devil's Rain-ში მასთან ერთად მონაწილე მსახიობმა გააცნო. ერთ-ერთ პოდკასტში კინოვარსკვლავმა აღნიშნა, რომ რელიგია მას მაშინ დაეხმარა და დღემდე ეხმარება.

4. ნილ გეიმანი

ცნობილი მწერალი ზრდასრულობაში საიენტოლოგიის ეკლესიის წევრი აღარ ყოფილა, თუმცა, ამ რელიგიის მიმდევრების ოჯახში გაიზარდა. გეიმანის მამა ორგანიზაციის ბრიტანული ნაწილის სპიკერი იყო, გავრცელებული ცნობით კი, ასევე საიენტოლოგები არიან მწერლის ყოფილი ცოლი და დები. არაერთი ბესტსელერის ავტორმა, მოგვიანებით, უარყო, რომ იგი საიენტოლოგია. აღსანიშნავია, რომ ეკლესია ზრდასრულ ასაკში ბევრმა ისეთმა წევრმა დატოვა, რომელიც მისი მიმდევრების ოჯახში გაიზარდა.

6. უილიამ ბეროუზი

კიდევ ერთი ცნობილი მწერალი, რომელიც თავის დროზე საიენტოლოგიის მიმდევარი იყო, ბეროუზია. შიშველი საუზმის ავტორი ეკლესიას 1960-იან წლებში შეურთდა, თუმცა, მოგვიანებით, რწმენაზე გული აიცრუა და ამაზე წიგნიც დაწერა. წიგნიც და ავტორის განცხადებებიც საიენტოლოგიას მისი წევრების ავტორიტარული მეთოდებით კონტროლში ადანაშაულებდა და გასაიდუმლოებული საქმიანობით დაზვერვის ცენტრალურ სააგენტოსაც კი ადარებდა.