ნეტავ, ასეთი რელევანტური აღარ იყოს — ელიზაბეთ მოსი მხევლის წიგნზე

ბოლო დროის ერთ-ერთი ყველაზე გახმაურებული სერიალის, The Handmaid’s Tale (მხევლის წიგნი), ვარსკვლავმა ელიზაბეთ მოსმა პროექტის მე-5 სეზონით გაგრძელებასა და მის აქტუალურობაზე ისაუბრა. მსახიობი სერიალის გადასაღებ მოედანზე იმყოფებოდა, როცა ცნობილი გახდა, რომ აშშ-ში უზენაესმა სასამართლომ, შესაძლოა, აბორტის უფლება შეუზღუდოს მოქალაქეებს.

იმის მიუხედავად, რომ მხევლის წიგნის ამ დროისთვის ბოლო, მეოთხე სეზონი, თითქმის ერთი წლის წინ დამთავრდა, სერიალი ახლახან მაინც ტვიტერის ტრენდებში მოექცა. საფრთხემ, რომელიც ქალების რეპროდუქციულ უფლებებს რეალობაში დაემუქრა, რა თქმა უნდა, ყველას მარგარეტ ეტვუდის დისტოპიური გილეადი მოაგონა.

"გადასაღებ მოედანზე ცოტათი მწუხარე განწყობა შეიქმნა, როცა ინფორმაცია გავრცელდა", — იხსენებს ინტერვიუში ემის ლაურეატი მოსი, რომელიც სერიალის აღმასრულებელი პროდიუსერიცაა, — "თუმცა, სამუშაოზე დაბრუნება და მისი შესრულება მაინც გიწევს.

"ეს ჩვენთვის ყოველთვის უცნაურია და საერთოდ არ არის სასიამოვნო. არ გვახარებს, როცა პარალელებს ავლებენ და შენი პერსონაჟი იმის მაგალითად მოჰყავთ, რაც რეალობაში ხდება. ეს არანაირად არ გვსიამოვნებს".

მომდევნო აბზაცი შეიცავს სპოილერს სერიალის მე-4 სეზონიდან

მხევლის წიგნის მეოთხე სეზონის კულმინაციურ სერიაში მოსის გმირი, ჯუნი, გილეადიდან გარბის და თავის ყოფილ მცველს, გამაუპატიურებელსა და მწამებელს, ფრედ უოტერფორდს კლავს. მსახიობის თქმით, მეხუთე სეზონში ნაჩვენები იქნება, თუ რას ნიშნავს თავისუფლების შეგრძნება ტრავმისა და შურისძიების გამოცდის შემდეგ.

"გვიხარია და გვეამაყება, რომ იმ სერიალს ვქმნით, რომელიც, ჩვენი აზრით, რელევანტურია და ამბობს იმას, რაც უნდა ითქვას", — დასძენს მოსი, — "თუმცა, ნეტავ, ასეთი რელევანტური აღარ იყოს".

მსახიობი და პროდიუსერი ასევე აღნიშნავს, რომ სერიალის რელევანტურობა, რა თქმა უნდა, მარგარეტ ეტვუდის დამსახურებაა. მან ათწლეულების წინ დაწერა წიგნი, რომელზეც სერიალია დაფუძნებული.

"მისი ბევრი გვმართებს", — ამბობს მოსი, — "ეტვუდმა ისაუბრა, თუ როგორ მეორდება ისტორია და მოვლენები".