პრეზიდენტს სალომე ზურაბიშვილის განცხადებით, სააკაშვილის ჯანმრთელობასთან დაკავშირებული საკითხი არის ქვეყნის რეპუტაციის და იმიჯის საკითხი. მისი თქმით, მიესალმება იუსტიციის სამინისტროს გადაწყვეტილებას, სააკაშვილი კლინიკაში გადაყვანასთან დაკავშირებით. განცხადებას პრეზიდენტის ადმინისტრაცია ავრცელებს.

"პრეზიდენტს მიაჩნდა და მიაჩნია, რომ ყველა ზომა უნდა იყოს მიღებული ექსპრეზიდენტის ჯანმრთელობის უზრუნველსაყოფად, რათა მის ჯანმრთელობასთან დაკავშირებით არც საზოგადოებაში და არც ევროპელი პარტნიორებისგან არ ჩნდებოდეს კითხვები. ეს არის ქვეყნის რეპუტაციის და იმიჯის საკითხი, რომელიც მოითხოვს გამჭვირვალობას, დიდ სიფრთხილეს და დაკვირვებას, რომ არ არსებობდეს რაიმე საფრთხე და მაქსიმალურად დაცული იყოს მისი ჯანმრთელობა.

ამდენად, საქართველოს პრეზიდენტი მიესალმება და სრულად უჭერს მხარს იუსტიციის სამინისტროს შეთავაზებას ექსპრეზიდენტის კლინიკაში გადაყვანასთან დაკავშირებით", — წერს პრეზიდენტის ადმინისტრაცია.

იუსტიციის მინისტრის, რატი ბრეგაძის განცხადებით, მიხეილ სააკაშვილს, შესაძლო გართულებების თავიდან არიდების მიზნით, შესთავაზებენ, რომ გადაიყვანონ კლინიკა ვივამედში, სადაც მას გამოკვლევებს ჩაუტარებენ.

ერთიანი ნაციონალური მოძრაობის პოლიტსაბჭოს თავმჯდომარე, კობა ნაყოფია ამბობს, რომ მიხეილ სააკაშვილი იუსტიციის სამინისტროს შეთავაზებაზე, გადაიყვანონ ვივამედში გამოკვლევების ჩასატარებლად, თანხმობას აცხადებს.