2015 წლიდან, ჯოან როულინგმა ახალი ტრადიცია დაამკვიდრა. ის ყოველ წელს ჰარი პოტერში მოკლული პერსონაჟების გამო ბოდიშს იხდის.

2015 წელს მან ფრედ უიზლის, ხოლო 2016-ში რემუს ლუპინის სიკვდილის გამო მოიხადა ბოდიში. ამ შემთხვევაში პოტერჰედები ერთსულოვნები იყვნენ და პერსონაჟების გამო საყოველთაო გლოვაში ერთვებოდნენ, თუმცა წლევანდელი შემთხვევა განსხვავებული აღმოჩნდა.

წელს როულინგმა ბოდიში სევერუს სნეიპის სიკვდილის გამო მოიხადა.

"ოკ. დადგა ამის დროს. ძალიან გთხოვთ ამის გამო ომი არ ატეხოთ, მაგრამ წელს მინდა, ბოდიში სნეიპის სიკვდილის გამო მოვიხადო. *გარბის სამალავისკენ*", წერს როულინგი ტვიტერზე.

როულინგის ბოდიშმა პოტერჰედებში არაერთგვაროვანი რეაქციები გამოიწვია და სნეიპის პერსონაჟის მიმართ ბევრი ნეგატიური აზრიც გამოითქვა.

მკითხველის აზრით, სნეიპი, რომელიც ჰარის, ჰერმიონს, ნევილს და სხვებს სიცოცხლეს უმწარებდა, სულაც არ იყო პოზიტიური პერსონაჟი და თანაც სიკვდილის მხვრელი (death eater) იყო.

"დარწმუნებული ვარ, ეგ ბავშვებზე მოძალადე სიკვდილს იმსახურებდა," წერს ერთ-ერთი მკითხველი, რომელიც ცნობილი ჰოლანდიელი რეჟისორი პოლ ვერჰოვენი არ არის, სხვაა.

ჰარი პოტერის ფანები როულინგს სთხოვენ სნეიპის ნაცვლად ბოდიში დობის და ჰედვიგის სიკვდილის გამო მოიხადოს.

თქვენ რას ფიქრობთ სნეიპის პერსონაჟზე, იმსახურებდა სიკვდილს?