კრემლის მთავარი პროპაგანდისტი, Russia Today-ის რედაქტორი, მარგარიტა სიმონიანი ირაკლი ღარიბაშვილის განცხადებით ისევ კმაყოფილია. კერძოდ, სიმონიანის წერს, რომ საქართველომ უარი თქვა დახმარებოდა უკრაინას მეორე ფრონტის გახსნით და ინიციატივით გამოდის, საქართველოსთან რუსეთმა ავიამიმოსვლა გახსნას.

"საქართველომ აფხაზეთში მეორე ფრონტის გახსნით უკრაინის დახმარებაზე უარი თქვა, მოდით, უკვე გავუხსნათ ავიამიმოსვლა", — წერს ის სოციალურ ქსელში.

სიმონიანმა 26 აპრილს განაცხადა, რომ საქართველოს მთავრობის პოზიციას კიდევ ერთხელ იწონებს. როგორც ის ტელეგრამზე წერს, ახლანდელი მთავრობა ამ სიტუაციაში "გასაოცრად ადეკვატურად იქცევა". სიმონიანი ერთ-ერთია იმ პირებს შორის, რომლებიც ევროკავშირმა დაასანქცირა.

დღეს, 27 აპრილს პრემიერმინისტრმა განაცხადა, რომ საქართველოში არავითარი მეორე ფრონტი არ იქნება.

"მას შემდეგ, რაც მე, ჩვენმა გუნდმა მკაფიოდ განვაცხადეთ და ვუთხარით, მათ შორის ჩვენს უკრაინელ მეგობრებს, რომ არავითარი მეორე ფრონტი არ იქნება საქართველოში, აი, მას შემდეგ დაიწყო ეს უსაფუძვლო ბრალდებების კასკადი", — თქვა მან.