უკრაინის პრეზიდენტის ადმინისტრაციის მრჩეველი, მიხაილო პოდოლიაკი წერს, რომ ოკუპანტი სამხედროები დატყვევებული უკრაინელის სიცოცხლის სანაცვლოდ, დედას გამოსასყიდად თანხას სთხოვენ. ის Twitter-ზე ვიდეოს აქვეყნებს, რომელიც მისი თქმით, ტყვის დედას გაუგზავნეს.

"ეს ვიდეო უკრაინელი პატიმრის დედას რუსმა ჯარისკაცებმა გაუგზავნეს. ორშაბათისთვის 5 000 ევროს ითხოვენ, წინააღმდეგ შემთხვევაში, მის შვილს შემდეგ ვიდეოში სიკვდილით დასჯიან. რუსი სამხედროები სულ უფრო მეტად ემსგავსება ISIS-ს. რუსეთი ტერორისტულ სახელმწიფოდ უნდა აღიარონ", — წერს ის.

ვიდეოში ოკუპანტების კითხვის საპასუხოდ, დატყვევებული სამხედრო ამბობს, რომ 109-ე ბრიგადის მოხალისეა. ოკუპანტები მას, ასევე, ეკითხებიან, თუ როგორ ექცევიან, რაზეც უკრაინელი სამხედრო ამბობს, რომ კარგად. ამასთან, აღნიშნავს, რომ აქვს საკვები, წყალი და ტუალეტი და მას არავინ სცემს.