ბრიტანეთში თეატრალური შოუ, რომელზეც 5 წლის ასაკის ბავშვებთან სქესობრივი განათლების შესახებ უნდა ესაუბრათ, გაუქმდა. ამის მიზეზი კი ის არის, რომ შოუს ორგანიზატორების მიმართ ძალადობრივი მუქარა არ წყდებოდა. როგორც თავად შოუს ორგანიზატორები აცხადებენ, მუქარის ავტორები "ექსტრემისტული შეხედულებების მქონე მცირე ადამიანთა ჯგუფი" იყო.

შოუ ჯერ კიდევ 2017 წლიდან არსებობს და სხვადასხვა ქალაქში წარმატებულადაც დაიდგა. თეატრალური შოუს დროს ბავშვებს სქესის, გენდერის, სქესობრივი ურთიერთობების და მასტურბაციის შესახებ ესაუბრებიან. გარდა ამისა, შოუს ზოგიერთი სცენა სიშიშვლის გარკვეულ ელემენტებსაც შეიცავს.

ფოტო: Lidia Crisafulli

მას შემდეგ, რაც თეატრალური შოუს თარიღი და შინაარსი ინტერნეტის მეშვეობით ცნობილი გახდა, პეტიცია შეიქმნა, რომელიც ამტკიცებდა, რომ ორგანიზაციის მიერ დაგეგმილი შოუ ბავშვებისთვის სრულიად შეუსაბამო იყო. კომპანია ThisEgg, რომელიც ბავშვებისთვის მსგავს შოუებს აორგანიზებს, აცხადებს, რომ საზოგადოება შინაარსის შესახებ ინფორმირებული იყო და თუ ვინმეს შოუზე ბავშვთან ერთად დასწრება სურდა, ეს მისი თავისუფალი არჩევანი იქნებოდა.

"საკუთარი სხეულის, სქესისა და ურთიერთობების შესახებ სპეციალისტები და ადამიანის უფლებების დამცველები ბავშვების განათლებას გვირჩევენ. თუმცა ისიც ვიცით, რომ კონკრეტულ ჯგუფებს ჩვენ მიმართ ცუდი დამოკიდებულება აქვთ. ისინი ბევრნი არიან და ხმამაღლა ყვირიან, ჩვენ კი თანამშრომლებზე უნდა ვიზრუნოთ", — განაცხადა კომპანია ThisEgg-მა შოუს გაუქმების შესახებ.