საპარლამენტო ოპოზიციამ წარმოადგინა ინიციატივა, რომ საკითხი ფაშიზმზე გამარჯვების დღის 9 მაისის ნაცვლად 8 მაისს აღნიშვნის შესახებ დაჩქარებული წესით განიხილონ. სტრატეგია აღმაშენებლის ლიდერის, გიორგი ვაშაძის განცხადებით, ერთ-ერთი მთავარი საკითხია ის, რომ რუსეთი ისტორიასა და თარიღებს ე.წ. "რუსული მსოფლიოს" შექმნისთვის.

"ახლოვდება 8-9 მაისი და ვფიქრობ, მნიშვნელოვანია საქართველომ კონკრეტული გადაწყვეტილებები მიიღოს ამ თარიღთან დაკავშირებით. დღეის მდგომარეობით, ფაშიზმზე გამარჯვების დღეს 8 მაისს აღნიშნავს აშშ, დიდი ბრიტანეთი, საფრანგეთი, ლიტვა, ლატვია, ესტონეთი და ევროპული სამყარო, ხოლო 9 მაისს აღნიშნავს რუსეთი, ევრაზიული კავშირის ქვეყნები ძირითადად, უზბეკეთი, ტაჯიკეთი, ბელარუსი და ა.შ.

მთავარი საკითხია ის, რომ რუსეთი, სამწუხაროდ, ისტორიასა და თარიღებს იყენებს ე.წ. რუსული მსოფლიოს შექმნისთვის და ძალიან ხშირად ხდება ამ თარიღებით მანიპულაცია, განსაკუთრებით 9 მაისით, რომელსაც უკავშირდება მათი ბაიკერების მსვლელობები და ა.შ. გეორგიევსკის ლენტებით და თვითონ აყენებს ამას, როგორც ცივილიზაციურ არჩევანს და ვფიქრობ, საქართველომაც ეს ცივილიზაციური არჩევანი უნდა გააკეთოს — აღვნიშნოთ ფაშიზმზე გამარჯვების დღე 8 მაისს, თუ 9 მაისს რუსეთთან ერთად.

მეორე მნიშვნელოვანია საკითხია, რომ ამით, ვფიქრობ, საქართველოს შენატანს ფაშიზმზე გამარჯვებაში, პირიქით, ხაზს ვუსვამთ. 300 000-ზე მეტმა ადამიანმა გაწირა თავი მეორე მსოფლი8ო ომის დროს, ჩვენმა თანამემამულეებმა. რაც ყველაზე მნიშვნელოვანია, რატომ ვითხოვთ ამ საკითხის დაჩქარებული წესით განხილვას — საქართველომ ევროკავშირის კანდიდატის სტატუსის დაჩქარებულ მოპოვებაზე მიიღო კონკრეტული კითხვარი, უნდა შევავსოთ და ვფიქრობ, რომ ძალიან კარგი გზავნილი იქნება ჩვენი ევროპელი მეგობრებისთვის. მეორეა რუსული აგრესია უკრაინაში, რაც წყალგამყოფია, ვფიქრობ, აბსოლუტურად ყველასთვის და განსაკუთრებით უკრაინაში ვიზიტის შემდეგ, ვფიქრობ, საქართველოს მხრიდან კარგი, სწორი გზავნილი იქნება", — განაცხადა ვაშაძემ.

ქართული ოცნების დეპუტატმა, ბექა ოდიშარიამ თქვა, რომ ამ საკითხის გადაწყვეტამდე ჯერ ვეტერანებს უნდა ჰკითხონ, რასაც პარლამენტის ოპოზიციონერი წევრი, დავით უსუფაშვილი დაეთანხმა, თუმცა, ასევე, აღნიშნა, რომ ამ საკითხის გადაწყვეტა დაგვიანდა, ახლა კი მკაფიოდაა ეს დასმული.

პარლამენტის საპროცედურო საკითხთა და წესების კომიტეტის თავმჯდომარემ, ირაკლი ქადაგიშვილმა ეს სასაათო სარტყელით ახსნა, რაზეც ნიკოლოზ სამხარაძე დაეთანხმა.

"მოცემულობა, რატომ აღმოჩნდა ყოფილი საბჭოთა კავშირი 9 მაისს და დასავლეთი, ევროპა 8 მაისს, უფრო გეოგრაფიული და დროის სარტყელით იყო აღწერილი ეს ისტორიი იმიტომ, რომ 1945 წლის 8 მაისის 23:00 საათზე რომ მოეწერა, დასავლეთში ჯერ იყო 8 მაისი და აღმოსავლეთ სასაათო სარტყელში 9 მაისი კალენდარულად და ამან გამოიწვია. დღეს ამას მიეცა პოლიტიკური განზომილება", — თქვა ქადაგიშვილმა.

ბექა ოდიშარიამ, ასევე, განაცხადა, რომ რუსეთთან ერთად, ანუ ერთსა და იმავე თარიღში საქართველო აღდგომასაც აღნინავს და ეს არაფერს ნიშნავს.

ბიუროს სხდომაზე საკითხის დაჩქარებული წესით განხილვას მხარი არ დაუჭირეს.