ევექსი ჰოსპიტლების მასშტაბური პროექტის, სიცოცხლის ელჩების მესამე სეზონი დასრულდა. ფინალური ღონისძიება მარჯანიშვილის თეატრში გაიმართა, სადაც ქსელის მედპერსონალი მთელი ქვეყნის მასშტაბით მონაწილეობდა.

სიცოცხლის ელჩები პირველი მასშტაბური პროექტია საქართველოში, რომელიც ქვეყნის მძლავრი ჯანდაცვის წარმოჩენასა და სამედიცინო პერსონალისადმი მადლიერების გამოხატვას ემსახურება. პროექტი უკვე მესამე წელია, სიცოცხლის გადარჩენის დაუჯერებელ ისტორიებს აერთიანებს და ფართო საზოგადოებას ყველა იმ განსაკუთრებულ შემთხვევას აცნობს, რომელიც ჰოსპიტლების კედლებს მიღმა რჩება.

2021 წელს, სიცოცხლის ელჩებში მონაწილეობა 76-მა მედპერსონალმა მიიღო. მომზადდა 26 დოკუმენტური ვიდეორგოლი განსაკუთრებული სამედიცინო შემთხვევების შესახებ, რომელსაც ხმა ჯამში 28 000-მდე ადამიანმა მისცა. ჩვენი დროის გმირების ყოველდღიური საქმიანობის მაგალითებმა წელსაც 8 სხვადასხვა მიმართულებით მოიყარა თავი. სწორედ მათ შორის გამოვლინდნენ გამარჯვებულები შემდეგ ნომინაციებში: წლის ნოვატორი, წლის მასწავლებელი, წლის დებიუტი, წლის ექსტრემალური გადაწყვეტილება, წლის გუნდი, წლის ექსპერტთა საბჭო, წლის გადარჩენილი სიცოცხლე, წლის გადარჩენილი სიცოცხლე (პედიატრია).

აღსანიშნავია, რომ სიცოცხლის ელჩები ევექსის ჰოსპიტალურ ქსელში 2019 წელს დაიწყო. 3 წლის განმავლობაში მასში მონაწილეობა მიიღო მედიცინის 217-მა პერსონალმა და გამოვლინდა 72 განსაკუთრებით რთული/საინტერესო სამედიცინო შემთხვევა. საერთო ჯამში, ვიდეორგოლებმა 12 მილიონამდე ნახვა დააგროვა.

ევექსი ჰოსპიტლების მასშტაბური პროექტი 2022 წლიდან კვლავ გაგრძელდება. ნომინაციებზე წარდგენილი კანდიდატების, მათი გამორჩეული სამედიცინო შემთხვევებისა და ყოველდღიური მოღვაწეობის შესახებ გადაღებული დოკუმენტური ვიდეორგოლების ნახვა შესაძლებელია სპეციალურად შექმნილ პლატფორმაზე.