კალიფორნიის შტატში, პარკში დაკარგული 16 წლის მოზარდი მაშველებმა ქვების ხრიალის ხმის გაგონებით იპოვეს.

ლოს-ანჯელესის პოლიციის ცნობით, ბიჭი, რომელსაც ლაპარაკი არ შეუძლია, პარკში დედასა და დასთან ერთად წავიდა, თუმცა, დილის 10 საათის შემდეგ გაუჩინარდა.

როცა ოჯახის წევრებმა ბიჭის კვალის პოვნა ვეღარ შეძლეს, საქმეში პოლიცია ჩაერთო. სწორედ მაშინ ახსენა მოზარდის დედამ სასხვათაშორისოდ, რომ თავის შვილს ქვებით თამაში უყვარდა.

პოლიციელები ამ დეტალს ალბათ დიდ ყურადღებას არც მიაქცევდნენ, მაგრამ როცა სამძებრო სამუშაოებში ჩართულმა ერთ-ერთმა თანამშრომელმა, სტივ გოლდსუორთიმ, ქვების ხმა გაიგონა, ბიჭის დედის ნათქვამი გაახსენდა. ჩხარუნის ხმას გაყოლილმა პოლიციელმა კი ბიჭი კანიონის მახლობლად მდგარი მუხის ხის ქვეშ იპოვა.

საბოლოოდ, მოზარდი, რომელთანაც კონტაქტში შესვლა და ნდობის მოპოვება პოლიციელებმა ადვილად შეძლეს, საკუთარ ოჯახს ვერტმფრენით უვნებელი დაუბრუნდა.

"ჩვენი დეპარტამენტი მოხარულია, რომ ამ ინციდენტს კეთილი დასასრული ჰქონდა", — წერია პოლიციის ფეისბუქზე გავრცელებულ განცხადებაში.