თბილისის სახელმწიფო უნივერსიტეტის ყოფილი რექტორი, ლადო პაპავა, edu.aris.ge-სთან ინტერვიუში თსუ-ში განვითარებულ მოვლენებზე საუბრობს და აცხადებს, რომ ერთი წლის წინ არსებული პროტესტის ტალღის და მიმდინარე პროცესების უკან უშიშროების სამსახური იდგა, რომელსაც უნივერსიტეტიდან მისი ჩამოშორება სურდა:

"2016 წლის მარტში განვითარებულ მოვლენებში და იმაში, რაც ამ მოვლენებს წინ უძღოდა უდიდეს როლს არა უშუალოდ სტუდენტები, არამედ გარკვეული ძალები თამაშობდნენ, რომლებიც უნივერსიტეტიდან ჩემ ჩამოშორებას ცდილობდნენ და ამისათვის, სამწუხაროდ, სტუდენტობასაც იყენებდნენ".

პაპავა დასძენს, რომ საუბარი არაა ყველა იმ სტუდენტზე, რომლებიც პროცესებში იყვნენ ჩართულები:

"მათ შორის ძალიან ბევრი ალალი, ღირსეული და წარმატებული ადამიანია. მე ყოველთვის ახალგაზრდობის მხარეს ვიყავი და ვიქნები კიდეც, სანამ ცოცხალი ვარ. თუმცა, ფაქტია, რომ იყვნენ გარკვეული ძალები, უშუალოდ უშიშროების სამსახურის მიერ მართულნი, რომლებიც სტუდენტებს, როგორც თვითმმართველობის, ისე მასთან დაპირისპირებულ ჯგუფის ზოგიერთ წევრს, იყენებდა".

პაპავა დასძენს, რომ ძირითადი პოლიტიკური პარტიებიდან მეგობრული ურთიერთობა არცერთის მიმართ ჰქონია, თუმცა არასდროს ყოფილა ნაციონალური მოძრაობის მხარდამჭერი და მისი გადაყენება სუს-ისა და ქართული ოცნების რამდენიმე პირის გადაწყვეტილებას უკავშირდება.

თსუ-ს ყოფილი რექტორი აცხადებს, რომ სტუდენტებს ამ პროცესებზე სრული ინფორმაცია არ ჰქონდათ.

პაპავას თქმით, უნივერსიტეტში მთავარი პრობლემა ე.წ. ოდეერის არსებობა არაა, რადგან, მისი თქმით, თსუ-ს არამხოლოდ სტუდენტები, არამედ აკადემიური პერსონალიც შეკრულია უშიშროებასთან.

ინტერვიუ წაიკითხეთ ვრცლად edu.aris.ge-ზე.