გორში მოქალაქე პრორუსული, ჰომოფობიური და ძალადობრივი ალტ-ინფოს ოფისთან მივიდა და მისი დახურვა მოითხოვა. ალტ-ინფოს წევრებმა მას შეურაცხყოფა მიაყენეს. აგინეს ადგილზე მყოფ მედიის წარმომადგენლებსაც.

"გააჯ*ით ყველამ აქედან", — ამბობდა ოფისიდან გამოსული ერთ-ერთი პირი.

მოქალაქის თქმით, მაშინ, როდესაც ამავე ქალაქში ოკუპანტებმა ბომბები ჩამოაგდეს, იქ პრორუსული ორგანიზაციის ოფისი არ უნდა იყოს. მაია სიჭინავამ მათ რუსეთის მიერ დაქირავებული პროპაგანდისტები უწოდა.

"ესენი არიან რუსეთის მიერ დაქირავებული პროპაგანდისტები, თავად ამბობენ, რომ რუსეთი აფინანსებს, ნუ აჰყვებით მათ პროპაგანდას, ესენი დგანან არასწორ, ბნელ გზაზე. გორელებს მივმართავ, სირცხვილია დღეს გორის ცენტრში მათი, პუტინისტების ოფისი იყოს გახსნილი და ეწეოდნენ რუსულ პროპაგანდას, როცა 5-ტონიანი ბომბა, აი, აქ, 2 ნაბიჯში ჩამოაგდეს და იბომბებოდა ქალაქი გორი", — თქვა მან.

ალტ-ინფოს ოფისების გახსნას არაერთ ქალაქში აპროტესტებენ. მათ ოფისები ოზურგეთში, ქედაში, შუახევსა და ხულოში უკვე დაახურინეს.