შინაგან საქმეთა სამინისტროს განცხადებით, ანგარებით ჩადენილი განზრახ მკვლელობის ბრალდებით, 1990 წელს დაბადებული პირი დააკავეს, რომელმაც ნათესავი ქალი მოკლა, შემდეგ კი ტელევიზორის ლომბარდში ჩაბარება სცადა.

"გამოძიებით დადგინდა, რომ ბრალდებულმა თბილისში, გლდანში, ნათესავ ქალს —1940 წელს დაბადებულ დ.ნ-ს, მისსავე საცხოვრებელ სახლში, ბასრი საგნით სხეულზე დაზიანება მიაყენა, რის შედეგადაც იგი ადგილზე გარდაიცვალა. მძიმე დანაშაულის შემდეგ ნ.ნ-მ ბინიდან ტელევიზორი წაიღო და ლომბარდში ჩაბარებას შეეცადა, თუმცა ვერ შეძლო. იგი კვლავ შემთხვევის ადგილზე დაბრუნდა, კვალის დაფარვის მიზნით ცხედარს ცეცხლი მოუკიდა და მიიმალა", — ნათქვამია განცხადებაში.

შსს-მ გამოძიება სისხლის სამართლის კოდექსის 109-ე მუხლის, მე-3 ნაწილის გ ქვეპუნქტით დაიწყო, რაც ანგარებით ჩადენილ განზრახ მკვლელობას გულისხმობს. დანაშაული 16-დან 20 წლამდე ან უვადო თავისუფლების აღკვეთას ითვალისწინებს.