24 იანვარს, თბილისში, რუსთაველის გამზირზე მომხდარ ავტოსაგზაო შემთხვევაში მონაწილე მძღოლის, 1993 წელს დაბადებული გიორგი ჯაფარიძის, სასამართლო პროცესი 2 მაისს გაიმართება.

როგორც თბილისის საქალაქო სასამართლოს პრესსამსახურმა On.ge-ის განუცხადა, გიორგი ჯაფარიძე კვლავ წინასწარ პატიმრობაში იმყოფება.

გამოძიების ფარგლებში დანიშნული ტრასოლოგიური, ავტოტექნიკური და სასამართლო-სამედიცინო ექსპერტიზების დასკვნების საფუძველზე დადგინდა, რომ მერსედესის მარკის ავტომანქანა, რომელსაც გიორგი ჯაფარიძე მართავდა, საპირისპირო ზოლში გადავიდა და შემხვედრი მიმართულებით მოძრავ ოპელისა და მერსედესის მარკის ავტომანქანებს შეეჯახა.

შეჯახების შედეგად, ადგილზე გარდაიცვალა ოპელის მგზავრი 26 წლის სოფო ბერიძე და დაშავდა ოთხი ადამიანი.

საპატრულო პოლიციამ გიორგი ჯაფარიძე თბილისის საქალაქო სასამართლოს განჩინების საფუძველზე დააკავა.

გამოძიება მიმდინარეობს ტრანსპორტის მოძრაობის უსაფრთხოების ან ექსპლუატაციის წესის დარღვევის ფაქტზე, რამაც გამოიწვია ერთი ადამიანის სიცოცხლის მოსპობა და ჯანმრთელობის ნაკლებად მძიმე და მძიმე დაზიანება (საქართველოს სსკ-ის 276-ე მუხლის 1-ლი, მე-3 და მე-5 ნაწილებით).