თბილისის საქალაქო სასამართლოს გადაწყვეტილებით, პირველი ლედის, მაკა ჩიჩუას ძმას, მიხეილ მგალობლიშვილს ცეცხლსასროლი იარაღის უკანონოდ შეძენა, შენახვისა და ტარებისათვის ოთხი წლით თავისუფლების აღკვეთა მიესაჯა.

ბრალდების მიხედვით, 2017 წლის 11 იანვარს, მიხეილ მგალობლიშვილის პირადი ჩხრეკის შედეგად ამოიღეს ბრაუნინგის კონსტრუქციის 1922 წლის მოდელის 7,65 მმ-იანი კალიბრის პისტოლეტი ერთი მჭიდით, მასში მოთავსებული 1900 წლის ნიმუშის 7,65მმ კალიბრის ერთი ცალი ვაზნით.

ასევე, საქმის მასალების თანახმად, ბრალდებულის საცხოვრებელი სახლის ჩხრეკისას ამოიღეს ქარხნული წესით წარმოებული, 1934 წლის 7,65 მმ ცეცხლსასროლი იარაღი, რომელიც გადაკეთებულია 1951 წლის ნიმუშის 9მმ კალიბრის ვაზნების გასასროლად.

საქალაქო სასამართლოს ცნობით, სხდომებზე, ბრალდებულმა დაადასტურა აღნიშნული ნივთების შენახვა და ტარება, თუმცა მიუთითა რომ ისინი მემკვიდრეობით მიიღო მამისგან.