შინაგან საქმეთა სამინისტროს განცხადებით, ფონიჭალის დასახლებასა და რეგიონებში ნარკოდანაშაულისთვის 22 ადამიანი დააკავეს, მათ შორის, 17 ნარკორეალიზატორია.

უწყების ცნობით, დაკავებული ნარკორეალიზატორების პირადი და საცხოვრებელი სახლების ჩხრეკისას, ნივთმტკიცებად განსაკუთრების დიდი ოდენობით სხვადასხვა სახის ნარკოტიკული საშუალებები და, სავარაუდოდ, ნარკოტიკების გაყიდვით მიღებული თანხები — 18 135 ლარი და 1 600 დოლარი ამოიღეს. ამასთან, იპოვეს საინექციოდ გამზადებული ნარკოტიკული საშუალებები.

დანაშაული 8-დან 20 წლამდე ან უვადო თავისუფლების აღკვეთას ითვალისწინებს.

"სამართალდამცველებმა, მოსამართლის განჩინების საფუძველზე, რამდენჯერმე განახორციელეს ნარკოტიკული საშუალებების, ჰეროინის, პრეგაბალინის, სუბოქსინისა და ალფა-პვპ-ს საკონტროლო შესყიდვა და აღნიშნული შესყიდვების ფარული აუდიო-ვიდეოჩაწერა", — ნათქვამია განცხადებაში.

გარდა ამისა, უწყების ცნობით, ნარკორეალიზატორებთან ერთად, სხვადასხვა დროს დიდი და განსაკუთრებით დიდი ოდენობით ნარკოტიკული საშუალების უკანონო შეძენა-შენახვისთვის 5 პირი დააკავეს.

გამოძიება სისხლის სამართლის კოდექსის 260-ე მუხლის პირველი, მე-3, მე-4, მე-5 და მე-6 ნაწილით მიმდინარეობს, რაც დიდი და განსაკუთრებით დიდი ოდენობით ნარკოტიკული საშუალების უკანონო შეძენა-შენახვას და გასაღებას გულისხმობს.