აჭარის ავტონომიური რესპუბლიკის თავმჯდომარის, თორნიკე რიჟვაძის აზრით, "შესაბამისი პასუხი" გასცა კითხვას, ვინ დაიწყო რუსეთ-უკრაინის ომი. მან თქვა, რომ შეკითხვა "რიტორიკულ-პროვოკაციული" იყო. Facebook-ზე გამოქვეყნებული საკმაოდ ვრცელი პოსტის მიუხედავად, მან არც ამჯერად დაასახელა, ვინ დაიწყო ომი და ტექსტის დიდი ნაწილი ოპონენტების კრიტიკას დაუთმო.

ის სამწუხაროს უწოდებს ფაქტს, რომ უკრაინაში მიმდინარე ომის ფონზე, "პოლიტიკურად ანგაჟირებულმა მედია საშუალებებმა, ფსევდოპატრიოტულმა პოლიტიკურმა ძალებმა და ნაცმოძრაობის სატელიტმა ორგანიზაციებმა", მოიცალეს მისი საგარეო პოლიტიკური პოზიციის და აკადემიური ბიოგრაფიის გაყალბებისთვის.

"რუსულ ოკუპაციასთან დაკავშირებით ჩემი პოზიცია და კონკრეტული ქმედებები საჯაროდ ცნობილია! ჩვენმა ხელისუფლებამ ყველა საერთაშორისო ფორმატში დაგმო რუსული აგრესია და მხარი დაუჭირა უკრაინის სუვერენიტეტს და ტერიტორიულ მთლიანობას! ე.წ. ჟურნალისტის რიტორიკულ-პროვოკაციულ კითხვაზე ომის დაწყებასთან დაკავშირებით პასუხიც გახლდათ შესაბამისი.

კიდევ ერთხელ ვადასტურებ ჩვენს მხარდაჭერას და თანაგრძნობას უკრაინელი ხალხის მიმართ ამ რთულ მომენტში და კონკრეტული ნაბიჯებით ვცდილობთ მათ მხარდაჭერას, ყველაფერს ვაკეთებთ აჭარაში მყოფი უკრაინელი მოქალაქეების უსაფრთხოებისთვის და მასპინძლობისთვის!" — წერს ის.

მან ასევე დასვა რიტორიკული კითხვა, უნდა უპასუხოს თუ არა "ევროსაბჭოს საპარლამენტო ასამბლეის რეზოლუციაზე ხელმომწერების, 2008 წლის ომის დაწყებაში საქართველოს ბრალმდებელი პარტიისა და მათი ტელევიზიების მიერ დასმულ პროვოკაციულ კითხვას" სერიოზულად.

"მე იქით მაქვს შეკითხვა, 2008-ში ვინ დაიწყო? შემთხვევით მაშინაც რუსეთმა ხომ არა? თუ კი, მაშინ ამას ხელი როგორ მოაწერეთ?! შემთხვევით მოღალატეები ხომ არ ხართ ამის გამო?!" — დაწერა მან.

რიჟვაძე ასევე გამოეხმაურა ტარას შევჩენკოს სახელობის კიევის სახელმწიფო უნივერსიტეტის განცხადებასაც, ოღონდ მხოლოდ იმ ნაწილს, რომელიც მის განათლებას ეხება და არა იმას, სადაც წერენ — " ვწუხვართ, რომ მას, როგორც ჩვენს ყოფილ სტუდენტს, უკრაინა არ შეუყვარდა". მისი განმარტებით, 2015 წელს ჩააბარა ტარას შევჩენკოს სახელობის კიევის სახელმწიფო უნივერსიტეტში დოქტორანტურაში ენერგეტიკის სამართლის მიმართულებით.

"2017 წელს სამწუხაროდ გარდაიცვალა დისერტაციის აკადემიური ხელმძღვანელი, ალექსანდრე ზადოროჟნი, ოჯახური და სამსახურებრივი გარემოებების გათვალისწინებით იძულებული გავხდი საკუთარი სურვილით ამეღო აკადემიური შვებულება და შემეწყვიტა სწავლა. შესაბამისად, ყველა ოფიციალურ წყაროში მითითებულია დოქტორანტი", — ამბობს რიჟვაძე.

იგივე წერია უნივერსიტეტის განცხადებაშიც, რომ თორნიკე რიჟვაძეს იქ დიპლომი არ მიუღია, რადგან 2017 წელს ოჯახური გარემოებების გამო უნივერსიტეტიდან საკუთარი ნებით გარიცხეს.

7 მარტს რიჟვაძემ პირდაპირ არ უპასუხა კითხვას, ვინ დაიწყო ომი უკრაინაში და თქვა, რომ ამისთვის ჟურნალისტებმა საერთაშორისო სასამართლოს და დარგის ექსპერტებს უნდა მიმართონ.