უკრაინაში რუსეთის შეჭრის შემდეგ მხოლოდ ჯარისკაცებს არ უწევთ ბრძოლა. არ უნდა დავივიწყოთ ექიმები, რომლებიც 24-საათიან რეჟიმში დაჭრილებსა და დაშავებულებს ეხმარებიან.

თავისი პაციენტების შესახებ ერთ-ერთი უკრაინელი ექიმი, სახელად ვიტალი, BuzzFeed-ს ესაუბრა. ვიტალიმ აღნიშნა, რომ ერთ დღესაც კლინიკაში სამი უცნაური ჯარისკაცი გამოჩნდა, რომლებმაც უკრაინულად ერთი სიტყვაც არ იცოდნენ, თუმცა უკრაინელი ჯარისკაცების ფორმები ეცვათ. ვიტალის თქმით, ისინი საბუთების მეშვეობით იდენტობას ვერ ადასტურებდნენ და ამასთანავე, ძალიან შეშინებულები იყვნენ.

საავადმყოფოს პერსონალმა პოლიციასთან ერთად მალევე შეძლო იმის დადასტურება, რომ ეს სამი ჯარისკაცი რუსი იყო და თავს უკრაინელებად აჩვენებდნენ. პარალელურად უკრაინის თავდაცვის მინისტრის მოადგილის განცხადებაც გავრცელდა, რომელიც ამბობდა, რომ ერთ-ერთ წარუმატებელი თავდასხმის შემდეგ რუსმა ჯარისკაცებმა უკრაინელების საბრძოლო მანქანები მოიპარეს და მათი ფორმები ჩაიცვეს.

ფოტო: Buzzfeed

ეჭვი არავის ეპარებოდა, რომ ჯარისკაცები რუსები იყვნენ, მაგრამ ვიტალიმ და მისმა კოლეგებმა ოპერაციების ჩატარება მაინც გადაწყვიტეს. ვიტალის თქმით, ოპერაციის განმავლობაში მუდმივად კონფლიქტური აზრები აწუხებდა და სულ იმაზე ფიქრობდა, რომ მტერს გადარჩენაში ეხმარებოდა.

"ვფიქრობდი, რომ მათ უნდა დავხმარებოდი, მაგრამ ოპერაციის დროს თავს ძალიან ცუდად ვგრძნობდი. ისეთი შეგრძნება მქონდა, რომ არასწორად ვიქცეოდი. ვფიქრობდი, რომ ჩემი ხალხის დახმარების სანაცვლოდ მტრის დასახმარებლად ვკარგავდი დროს", — ამბობს ვიტალი.

მძიმე ჭრილობების გამო უკრაინელმა ექიმებმა ერთი რუსი ჯარისკაცი ვერ გადაარჩინეს. დანარჩენი ორის ოპერაციამ წარმატებით ჩაიარა და ისინი გამოჯანმრთელებამდე საავადმყოფოს პატარა საკანში რჩებიან.

"ექიმები ჩვენს საქმეს ვაკეთებთ, რადგან ეს ჩვენი მოვალეობაა. გამოჯანმრთელების შემდეგ კი რუსებს უკრაინელ ჯარისკაცებში გავცვლით. ამას ვეუბნები საკუთარ თავს, რომ რუსი ჯარისკაცების გადარჩენა უკრაინელების დაბრუნებას შეიწყობს ხელს", — დასძინა ვიტალიმ.