აქტივისტი პოლიციელისთვის ფქვილის შეყრის გამო დააკავეს. კადრებში ჩანს, რომ სამართალდამცავი მისთვის ფქვილის წართმევას ცდილობს, რაზეც აქტივისტი ეკითხება, რატომ ეხება კერძო საკუთრებას. ფქვილი ნაწილი დაიყარა, ნაწილი კი აქციის მონაწილემ პოლიციელს შეაყარა.

"გახსენი", "გადმოიყვანე" — ისმის სამართალდამცავების მოწოდება რის შემდეგაც რამდენიმე პოლიციელი მას უხეში ძალის გამოყენებით აკავებს. შემთხვევის ამსახველი კადრები რამდენიმე მედიამ გაავრცელა.

გარდა ამისა, აქციის რამდენიმე მონაწილე მთავრობის კანცელარიასთან შენობისთვის ტუალეტის ქაღალდის სროლის გამო დააკავეს.

სირცხვილიას განცხადებით, დაკავებულია მოძრაობის 4 წევრი: გიორგი მჟავანაძე, გიგა მაქარაშვილი, ნოდარ რუხაძე და ზუკა ბერძენიშვილი. მათივე თქმით, ისინი აქციის დასრულების შემდეგ უმიზეზოდ დააკავეს.

იმის გასარკვევად, თუ რა მუხლით არიან ისინი დაკავებულები On.ge შინაგან საქმეთა სამინისტროს დაუკავშირდა. პასუხს მიღებისთანავე შემოგთავაზებთ.