მას შემდეგ, რაც ფრანგულ რესტორანს მენიუში შეტანილი კერძის სახელის გამო მუქარები შეუთვალეს, კვების ობიექტს თავის მართლება მოუწია.

საქმე ისაა, რომ მომხმარებლების ნაწილს პუტინის (Poutine) სალათის სახელი რუსეთის პრეზიდენტის პატივსაცემად დარქმეული ეგონა. მით უმეტეს, რომ რესტორანს, არც მეტი, არც ნაკლები, პუტინის სახლი (La Maison de la Poutine) ჰქვია.

კვების ობიექტი ტვიტერზე წერს, რომ მთავარი კერძის სახელის გამო მათ "შეურაცხმყოფელი და მუქარის შემცველი" წერილები მიიღეს.

"ამდენად, როგორც ჩანს, საჭიროა, შეგახსენოთ, რომ La Maison de la Poutine-ს არანაირი კავშირი არ აქვს რუსეთის რეჟიმთან და მის ლიდერთან", — წერია ტვიტში, რომელსაც რესტორნის ლოგო, გულის ემოჯი და უკრაინის დროშა ერთვის.

"ჩვენი კერძი კვებეკში შეიქმნა 1950-იან წლებში. მის წარმომავლობასთან დაკავშირებული არაერთი ისტორია არსებობს, თუმცა, ერთი რამ ზუსტად ვიცით: პუტინის სალათი საკუთარ საქმეზე შეყვარებულმა მზარეულებმა შექმნეს, რათა მომხმარებლებისთვის სიამოვნება მიენიჭებინათ", — წერს პარიზული რესტორანი.

კვების ობიექტი ასევე მხარდაჭერას უცხადებს "უკრაინელ ხალხს, რომელიც შეუპოვრად იბრძვის საკუთარი თავისუფლებისთვის და რუსეთის ტირანული რეჟიმის წინააღმდეგ".

თუმცა, პუტინის სალათმა გაუგებრობა მხოლოდ საფრანგეთში როდი გამოიწვია. წინა კვირას, რუსეთის უკრაინაში შეჭრის პასუხად, კვებეკში მდებარე ერთ-ერთმა რესტორანმა კერძის დასახელება ამოიღო მენიუდან. ამასთან, კერძის შემქმნელად მიჩნეული ობიექტი ფეისბუქპოსტში, რომელიც ამ დროისთვის აღარ იძებნება, აცხადებდა, რომ სალათს დროებით "წვნიან შემწვარ კარტოფილად და ყველად" მოიხსენებდნენ.

ეს პირველი შემთხვევა არაა, როცა კერძის დასახელების შეცვლის საფუძველი პოლიტიკური სიტუაცია გახდა. 2003 წელს, ერაყის ომში საფრანგეთის პოზიციის გამო, რამდენიმე რესტორანი ფრანგულ ფრის "თავისუფლების ფრიდ" მოიხსენებდა.