ვაშინგტონში რუსეთის საელჩოს წინ მდებარე ქუჩას არაოფიციალურად ახალი სახელი მიენიჭა: "პრეზიდენტ ზელენსკის გზა". აქტივისტებმა ნიშანი, რომელზეც ქუჩის ახალი დასახელება წერია და ერთი შეხედვით ნამდვილსაც ჰგავს, რუსეთის საელჩოს წინ პროტესტის ნიშნად განათავსეს.

"ეს სიმბოლური ჟესტია, რომელიც გამოხატავს, თუ რას ვგრძნობთ ამერიკელები უკრაინის ომთან მიმართებაში. აშკარაა, რომ ომსა და მასთან დაკავშირებულ ტრაგედიაზე, რომელიც უკრაინას თავს დაატყდა, მხოლოდ ერთი ადამიანია პასუხისმგებელი და ის ვლადიმერ პუტინია", — ამბობს პოლიტიკური აქტივისტი, კლოდ ტეილორი, Insider-თან ინტერვიუში.

ტეოლორმა ორგანიზაცია, სახელად Mad Dog PAC, 2017 წელს დააარსა და თავიდან დონალდ ტრამპის ქმედებებს აპროტესტებდა. აქტივისტმა აღნიშნა, რომ ორგანიზაცია სხვადასხვა პროტესტის ფორმით ხშირად ეხმაურება მსოფლიოში მიმდინარე მოვლენებს და უკრაინის მხარდაჭერაც მათ შორის ერთ-ერთია.

აქტივისტების თქმით, ქუჩის ნიშანი ნამდვილს ძალიან ჰგავს და რუსეთის საელჩოს წინ ის გასულ კვირას, ღამის 3-ის ნახევარზე, განათავსეს. ჯერჯერობით უცნობია, თუ რამდენ ხანს დატოვებენ ქუჩის ნიშანს, რადგან მისი მოხსნა საელჩოს ნებისმიერ წევრს შეუძლია.

ტეილორის განცხადებით, ქუჩის ნიშნის მეშვეობით მთავარ მიზანს უკვე მიაღწია, რადგან უკრაინის მიმართ მხარდაჭერა გამოხატა და ბევრი ადამიანის ყურადღებაც მიიქცია. "ეს მხოლოდ მშვიდობიანი, არაძალადობრივი და ჩუმი პროტესტის ფორმაა", — ამბობს ტეილორი.