მიუხედავად იმისა, რომ რუსი ოლიგარქები რუსული აგრესიის ფონზე უკვე გრძნობდნენ დასავლეთისგან ზეწოლას, Bloomberg-ის ცნობით, მას შემდეგ, რაც ვლადიმერ პუტინი უკრაინაში შეიჭრა, 24 საათში მათ 39 მილიარდ დოლარამდე დაკარგეს — ეს იმაზე მეტია, ვიდრე მთელი წლის განმავლობაში.

გამოცემა წერს, რომ მოსკოვის საფონდო ბირჟის ინდექსი (MOEX Russia Index) 33%-მდე შემცირდა, რაც საფონდო ბირჟის ისტორიაში ერთ-ერთი ყველაზე უარესი მაჩვენებელია. Bloomberg-ის განცხადებით, ყველაზე მკვეთრი ვარდნა ჰქონდა ვაგიტ ალეკპეროვს, ლუკოილის ხელმძღვანელს — Bloomberg Billionaires Index-ის თანახმად, ის დღეში მესამედით, 6,2 მილიარდი დოლარით შემცირდა. ამასთან, მოსკოვში დაფუძნებული ნავთობის მწარმოებლის აქციების ფასი 33%-ით დაეცა.

ფოტო: bloomberg

რაც შეეხება ფოლადის მწარმოებელი კომპანიის Severstal-ის ხელმძღვანელს, ალექსეი მორდაშოვს, მან ხუთშაბათს 4,2 მილიარდი დოლარი დაკარგა, რამაც მისი ქონება 23 მილიარდ დოლარამდე შეამცირა. Norilsk Nickel-ის პრეზიდენტმა და რუსეთში ყველაზე მდიდარმა ადამიანმა, ვლადიმერ პოტანინმა კი, 3 მილიარდი დოლარი დაკარგა.

Bloomberg-ის ცნობით, ვაგიტ ალეკპეროვმა და გენადი ტიმჩენკომ ამ წელს, დაახლოებით, 10 მილიარდი დოლარი დაკარგეს, რაც მათი ქონების 40%-ზე მეტია. Bloomberg wealth index-ის თანახმად, რუს მილიარდერებს შორის ეს ყველაზე მაღალი პროცენტული ვარდნაა.

პარალელურად, ეს შეეხო ქართული ოცნების დამფუძნებელს, ბიძინა ივანიშვილსაც. Bloomberg წერს, რომ ბოლო 24 საათში მისი ქონება 50 მილიონი დოლარით შემცირდა.

პუტინის მხრიდან უკრაინაზე თავდასხმის შემდეგ რეკორდულად მცირდება რუსული კომპანიების აქციების ღირებულება. შესაძლებელია ითქვას, რომ მოსკოვის საფონდო ბირჟაზე პანიკაა. პუტინის აგრესიის შედეგად გაუფასურდა რუსული რუბლიც.

პუტინმა უკრაინაში ომი 24 თებერვალს დაიწყო, რომელსაც თავად სპეციალურ "სამხედრო ოპერაციას" უწოდებს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში

გაიგეთ მეტი: