რუსეთის უკრაინაში შეჭრის შემდეგ საქართველოში უკრაინის მოქალაქეებს დახმარებას სთავაზობენ, იქნება ეს სახლი, თავშესაფარი თუ სხვა ტიპის საჭიროება. სურვილს ადგილობრივები — როგორც მოქალაქეები, ასევე კომპანიები და სხვადასხვა სასტუმრო გამოთქვამენ.

ლელოს წევრი, ირაკლი კუპრაძე ფეისბუქგვერდზე წერს, რომ სასტუმროების ქსელი მგზავრები მზადაა, ბათუმში, ბაკურიანში, გონიოსა და თბილისში თავისი სასტუმრო კორპუსები უკრაინელ ბავშვებს, ქალებსა და ომის მსხვერპლებს დაუთმოს, რათა მათ ომის მიმდინარეობისას დროებითი თავშესაფარი ჰქონდეთ. მისივე ინფორმაციით, სასტუმრო რჩეული მარანი თელავში თავშესაფრად უკრაინის მოქალაქეებს 30-ნომრიან სასტუმროს სთავაზობს.

პოსტს არაერთი გამოხმაურება აქვს. იმავე სურვილს გამოთქვამენ მოქალაქეებიც.

გამომცემლობა წიგნები ბათუმშის დამფუძნებელი, ირაკლი ბაკურაძე საცხოვრებელს სთავაზობს მათ, ვისაც განვითარებული მოვლენების შედეგად საქართველოში მოუწია დარჩენა.

ევროკლუბის დამფუძნებელი, ნიკა გურინი წერს, რომ მზადაა, ყვარელში, სასტუმროში 5 უკრაინელი განათავსოს და ყველა საჭირო ხარჯი საკუთარ თავზე აიღოს.

უკრაინის მოქალაქეებს დახმარებას სთავაზობს პოლიტოლოგი გიორგი კანაშვილიც.

მცხეთაში მდებარე კაფე ჩექინ გარდენ ქალაქში უკრაინის მოქალაქეებს უფასო კვებას სთავაზობს.

ახალი ქართული გიმნაზია წერს, რომ უკრაინიდან გამორიდებულ ბავშვებს საგანმანათლებლო მომსახურებას უფასოდ გაუწევენ.

ალექსანდრე გიორგაძემ უკრაინელ ტურისტებს სახლი დაუთმო.

მსგავსი შინაარსის პოსტები სოციალურ ქსელში, სხვადასხვა თემატურ ჯგუფში — მაგალითად, Spend 4 Seasons in Georgia-სა და მოგზაურთა კლუბში არაერთი იწერება.

"შემიძლია, ვუმასპინძლო რამდენიმე ადამიანს ქუთაისში"; "თუ ვინმე უკრაინელი არის ჩარჩენილი საქართველოში, 2 ადამიანი შემიძლია დავიტოვო თბილისში", — წერენ ისინი.

გუშინ, 23 თებერვალს ლელოს ლიდერმა, მამუკა ხაზარაძემ განაცხადა, რომ საჭიროების შემთხვევაში მზადაა, საქართველოში 100 უკრაინელ ბავშვს "უმასპინძლოს".

მასალა განახლდება და მსგავს ინიციატივებზე ინფორმაციას განახლებად რეჟიმში შემოგთავაზებთ.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს და მიზეზად ოკუპირებული დონეცკისა და ლუგანსკის სეპარატისტი ლიდერების "დახმარების თხოვნას" ასახელებს. ის ამტკიცებს, თითქოს ეს "ოპერაცია" არის თავდაცვა მათგან, ვინც "უკრაინა ტყვედ აიყვანა". ტრადიციულ პროპაგანდისტულ მოტივებზე პუტინი იმეორებს, რომ არ აპირებს უკრაინის ოკუპაციას და უკრაინელი ხალხის თვითგამორკვევის უფლებას უჭერს მხარს.

უკრაინის შინაგან საქმეთა მინისტრის მრჩევლის, ანტონ გონჩარენკოს განცხადებით, განხორციელდა სარაკეტო დარტყმები სამხედრო ადმინისტრაციის ცენტრებზე, აეროდრომებზე, სამხედრო საცავებზე, კიევთან, ხარკოვთან, დნეპრთან. მისივე თქმით, ხდება საზღვრის საარტილერიო დაბომბვა.

უკრაინის საგარეო საქმეთა მინისტრი, დმიტრი კულება აცხადებს, რომ რუსეთმა მათ წინააღმდეგ სრულმასშტაბიანი ომი დაიწყო და მშვიდობიან ქალაქები იბომბება. მისი თქმით, უკრაინა თავს დაიცავს და მსოფლიომ პუტინი ახლავე უნდა შეაჩეროს.

უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა. მან მოუწოდა ხალხს, არ აჰყვნენ პანიკას. მისი თქმით, ყველაფრისთვის მზად არიან და ყველას დაამარცხებენ.

ამავე თემაზე:

გაიგეთ მეტი: