სენაკის საკრებულომ თავმჯდომარედ გიორგი გახარიას გუნდის წევრი ირაკლი კაჭარავა აირჩია, მას ნაციონალურმა მოძრაობაც დაუჭირა მხარი. ქართული ოცნება კვლავ ბოიკოტს აცხადებს და სასამართლოს მიმართავს.

როგორც სენაკის მუნიციპალიტეტის საკრებულოს თავმჯდომარე ირაკლი კაჭარავა ამბობს, ამ გადაწყვეტილებით, საკრებულო ფუნქციური გახდება.

"უამრავი ბარიერის მიუხედავად, თავიანთი არ მოსვლის მიუხედავად, აპარატის ბოიკოტის მიუხედავად ჩვენ კანონის სრული დაცვით მაინც მოვახერხეთ და შევძელით იმდენი, რომ საკრებულოს თავმჯდომარე ავირჩიეთ. ეს არის გადაწყვეტილება იმისთვის, რომ საკრებულო გახდეს ფუნქციური. ჩვენ რეალურად მხოლოდ ამ გადაწყვეტილებაზე შევთანხმდით, რომ საკრებულო გახდეს ფუნქციური. აქ მსხდომმა ადამიანებმა ეს გაიაზრეს, სამწუხაროა, რომ ქართული ოცნების წარმომადგენლები", — ამბობს ის.

სენაკის მუნიციპალიტეტის საკრებულოს დეპუტატი ინგა ქარდავა ახლად არჩეულ საკრებულოს თავმჯდომარეს დიდი მომავალს ვერ უწინასწარმეტყველებს და ამბობს, რომ ქართული ოცნების "გამოზრდილი" კაჭარავა ერთ კვირაში დატოვებს თანამდებობას.

23 თებერვალს დილით ქართული ოცნების წევრებმა ბრიფინგი გამართა და თქვა, რომ საკრებულოში მიმდინარე პროცესი არაკანონიერია, რის გამოც სასამართლოს მიმართავენ და 9 თებერვლის მიღებული რამდენიმე გადაწყვეტილების გაუქმებას ითხოვს. კერძოდ სხდომაზე გადაირჩიეს დროებითი სამანდატო კომისიის თავმჯდომარე და ოპოზიციონერი დეპუტატის უფლებამოსილება ცნეს. "ოცნებაში" მიაჩნიათ, რომ ამ გადაწყვეტილების მიღების დროს არ დაიცვეს კანონმდებლობით გათვალისწინებული წესები — სხდომას დეპუტატთა მინიმალური რაოდენობის, 17 დეპუტატის ნაცვლად, 16 ესწრებოდა.

საკრებულოს ოპოზიციაში კი აცხადებენ, რომ კანონი არ დაურღვევიათ, რადგან 9 თებერვალს არ ჩატარებულა ახალი სხდომა, ეს იყო 3 დეკემბერს კვორუმით გახსნილი და გადადებული სხდომის გაგრძელება.

სენაკის მუნიციპალიტეტის საკრებულოს დღევანდელ სხდომაზე უფლებამოსილების შეწყვეტის შესახებ განცხადება გააკეთა საკრებულოს აპარატის უფროსმა ვეფხვია რუსიამ. ოპოზიციური პარტიების წარმომადგენლები აღნიშნავენ, რომ აპარატის უფროსზე მმართველი პარტია ზეწოლას ახდენდა.