ვლადიმერ პუტინის მიერ დონეცკისა და ლუგანსკის "დამოუკიდებელ რესპუბლიკებად" აღიარების შემდეგ, უკრაინამ, შესაძლოა, რუსეთთან დიპლომატიური ურთიერთობების გაწყვეტა განიხილოს. ამაზე პრეზიდენტმა, ვოლოდიმირ ზელენსკიმ ესტონელ კოლეგასთან ერთად გამართულ ბრიფინგზე ისაუბრა.

"საგარეო საქმეთა სამინისტროსგან მოთხოვნა მივიღე. მე განვიხილავ უკრაინასა და რუსეთის ფედერაციას შორის დიპლომატიური ურთიერთობების გაწყვეტას. ჩვენი კონფერენციის შემდეგ, ამ საკითხს დაუყოვნებლივ განვიხილავ", — თქვა მან.

მან, ასევე, მოუწოდა უკრაინის პარტნიორებს, რომ სანქციების დასაწესებლად შემდგომ ესკალაციას არ დაელოდონ. ზელენსკის განცხადებით, ეს მათ შორის უნდა მოიცავდეს Nord Stream 2 გაზსადენის პროექტის შეჩერებას.

ზელენსკის ამ განცხადებას გამოეხმაურა რუსეთის საგარეო საქმეთა მინისტრის მოადგილე, ანდრეი რუდენკო და აღნიშნა, რომ რუსეთი დიპლომატიური ურთიერთობების გაწყვეტას არ განიხილავს.

"ჩვენ ამ გადაწყვეტილებაზე არ გვიფიქრია. ეს არ არის ჩვენი არჩევანი. ეს იქნება კიევის არჩევანი", — განაცხადა რუდენკომ.

რუსეთის პრეზიდენტმა, ვლადიმერ პუტინმა უკრაინის ოკუპირებული ტერიტორიები თვითგამოცხადებული ლუგანსკი და დონეცკი "დამოუკიდებელ რესპუბლიკებად" აღიარა. პუტინმა ეს გადწყვეტილება უკრაინის "აგრესიით" ახსნა და გასამართლებლად არაერთი პროპაგანდისტული მესიჯი გააჟღერა. მან უკრაინის ხელისუფლებას მოუწოდა, "დროულად შეწყვიტონ სამხედრო ქმედებები", წინააღმდეგ შემთხვევაში კი "ნებისმიერ სისხლისღვრაზე" პასუხისმგებლობა მათ დააკისრა.

პუტინის გადწყვეტილება მინსკის შეთანხმების უხეში დარღვევაა, რასაც უკვე გამოეხმაურნენ მსოფლიო ლიდერები. ეს ქმედება დაგმო საქართველომაც.

აღიარების შემდეგ პუტინმა უკრაინის ტერიტორიაზე ჯარები გაგზავნა, მოტივად კი ისევ "სამშვიდობო მისია" დაასახელა. პუტინი ბრძანებაში ამტკიცებს, თითქოს უკრაინის ორი რეგიონის "დამოუკიდებლობა" კონფლიქტის მშვიდობიანი რეგულირებისა და მინსკის შეთანხმების გათვალისწინებით აღიარა.

დოკუმენტში ასევე ვკითხულობთ, რომ რუსეთს საგარეო საქმეთა სამინისტროს დაევალა, დონეცკისა და ლუგანსკის "მთავრობებთან" მოამზადოს მეგობრობის და ორმხრივი ურთიერთობების შეთანხმება. პუტინის ბრძანების მიხედვით, დონეცკისა და ლუგანსკის "მმართველების" მიმართვის საფუძველზე, შეთანხმების დადებამდე "სამშვიდობო მისიით" გააგზავნიან ჯარებს.