უკრაინის პრეზიდენტმა, ვოლოდიმირ ზელენსკიმ ვიდეომიმართვა გაავრცელა და განაცხადა, რომ უკრაინას არავის და არაფრის ეშინია. მისი თქმით, რუსეთის პრეზიდენტის, ვლადიმერ პუტინის გადაწყვეტილება ოკუპრებული დონეცკის და ლუგანსკის "დამოუკიდებლობის" აღიარებასთან დაკავშირებით უკრაინის ეროვნული მთლიანობისა და სუვერენიტეტის დარღვევაა.

"ჩვენ ჩვენს მიწაზე ვართ, არავის და არაფრის გვეშინია, არავისი არაფერი გვმართებს და არავის არაფერს დავუთმობთ. ამაში დარწმუნებულები ვართ", — თქვა ზელენსკიმ თავის ვიდეომიმართვაში.

ზელენსკის თქმით, უკრაინის საერთაშორისო საზღვრები "ასეთი დარჩება" მიუხედავად რუსეთის განცხადებებისა და მუქარისა. მანვე აღნიშნა, რომ უკრაინა თავისი საერთაშორისო მხარდამჭერების ნათელ და ეფექტურ ნაბიჯებს ეყრდნობა.

უკრაინის პრეზიდენტი ამბობს, რომ პუტინის ბოლო ნაბიჯი ძირს უთხრის მიმდინარე მშვიდობიან მოლაპარაკებებს და შეიძლება ნიშნავდეს რუსეთის ფედერაციის ცალმხრივ გამოსვლას მინსკის შეთანხმებიდან, ასევე ნორმანდიის შეთანხმების იგნორირებას.

ზელენსკიმ განაცხადა, რომ უკრაინამ დაიწყო საგანგებო შეხვედრა ნორმანდიის ოთხეულთან, რომელშიც შედიან გერმანია, რუსეთი, უკრაინა და საფრანგეთი.

რუსეთის პრეზიდენტმა, ვლადიმერ პუტინმა უკრაინის ოკუპირებული ტერიტორიები თვითგამოცხადებული ლუგანსკი და დონეცკი "დამოუკიდებელ რესპუბლიკებად" აღიარა. პუტინმა ეს გადწყვეტილება უკრაინის "აგრესიით" ახსნა და გასამართლებლად არაერთი პროპაგანდისტული მესიჯი გააჯღერა. მან უკრაინის ხელისუფლებას მოუწოდა, "დროულად შეწყვიტონ სამხედრო ქმედებები", წინააღმდეგ შემთხვევაში კი "ნებისმიერ სისხლისღვრაზე" პასუხისმგებლობა მათ დააკისრა.

პუტინის გადწყვეტილება მინსკის შეთანხმების უხეში დარღვევაა, რასაც უკვე გამოეხმაურენ მსოფლიო ლიდერები. ეს ქმედება დაგმო საქართველომაც.

აღიარების შემდეგ პუტინმა უკრაინის ტერიტორიაზე ჯარები გაგზავნა, მოტივად კი ისევ "სამშვიდობო მისია" დაასახელა. პუტინი ბრძანებაში ამტკიცებს, თითქოს უკრაინის ორი რეგიონის "დამოუკიდებლობა" კონფლიქტის მშვიდობიანი რეგულირებისა და მინსკის შეთანხმების გათვალისწინებით აღიარა.

დოკუმენტში ასევე ვკითხულობთ, რომ რუსეთს საგარეო საქმეთა სამინისტორს დაევალა, დონეცკისა და ლუგანსკის "მთავრობებთან" მოამზადოს მეგობრობის და ორმხრივი ურთიერთობების შეთანხმება. პუტინის ბრძანების მიხედვით, დონეცკისა და ლუგანსკის "მმართველების" მიმართვის საფუძველზე, შეთანხმების დადებამდე "სამშვიდობო მისიით" გაგაზავნიან ჯარებს.