თებერვალში კანიე ვესტი საზოგადოების ყურადღების ცენტრში არაერთხელ მოექცა. სოციალურ ქსელებში ყოფილი ცოლის, კიმ კარდაშიანისა და მისი ახალი შეყვარებულის შესახებ ახალ-ახალი პოსტების წერის შემდეგ, ამჯერად მუსიკოსმა ფანებს მოულოდნელი სიახლე შესთავაზა. კანიეს განცხადებით, გულშემატკივრებს ახალი ალბომის, Donda 2-ის მოსმენა მხოლოდ $200-ის ღირებულების მოწყობილობით — Stem Player-ით შეეძლებათ.

კანიემ საკუთარი გადაწყვეტილება მუსიკის "მჩაგვრელ ინდუსტრიასთან" ბრძოლის სურვილით გაამართლა:

"Donda 2 მხოლოდ ჩემს პლატფორმაზე, Stem Player-ზე იქნება ხელმისაწვდომი და არა Amazon-ზე, Spotify-ისა ან YouTube-ზე. დღეს მუსიკოსები ინდუსტრიაში შესული თანხის მხოლოდ 12%-ს იღებენ. დროა, მუსიკა ამ მჩაგვრელი სისტემისგან გავათავისუფლოთ. დროა, მართვის სადავეები ხელში ავიღოთ და ჩვენი სისტემა შევქმნათ", — დაწერა მუსიკოსმა ინსტაგრამზე.

ფანების უდიდესი ნაწილი კანიეს გადაწყვეტილებით უკმაყოფილო და იმედგაცრუებული დარჩა. ამის მიზეზი კი ისაა, რომ, მათი თქმით, $200-იანი Stem Player-ის ყიდვა ძვირი სიამოვნებაა და ამას ვერ შეძლებენ. ზოგიერთი ფანი იმდენად გაბრაზდა, რომ მუსიკოსისთვის ბოიკოტის გამოცხადებასაც აპირებს.

Stem Player

"სტრიმინგ პლატფორმები არ მოგწონს? კარგი, მაშინ შენი ალბომი ვებგვერდზე გაყიდე. თუ გინდა, მხოლოდ ალბომის ფიზიკური ასლები გაყიდე. მაგრამ როცა მუსიკა მხოლოდ $200-იან მოწყობილობაზეა ხელმისაწვდომი, ეს აბსურდულობის საზღვრებს ცდება და გამართლება არ აქვს. ამით მხოლოდ საკუთარ ფანებს აზარალებს", — წერს ერთ-ერთი ფანი რედიტზე.

"უამრავ ადამიანს ფინანსურად უჭირს და მილიარდერს უნდა, რომ ღარიბ ხალხს რაღაც სიმღერები $200-ის სანაცვლოდ მოასმენინოს", — წერს მეორე ფანი რედიტზე.

გულშემატკივრების ნაწილი კანიეს აფრთხილებს, რომ მის მუსიკას პირატული გზებით მაინც მოუსმენენ.

"კანიე, DONDA 2-ისთვის $200-ს არ გადავიხდი. ყველაფერს ონლაინ ვიპოვი"

ფანების უკმაყოფილებას კანიე, რომლის ქონებაც $1,8 მილიარდადაა შეფასებული, მალევე გამოემხაურა და აღნიშნა, რომ საკუთარ ხელოვნების ფასს თავად განსაზღვრავს. კანიეს თქმით, ტექნოლოგიების გავლენით მუსიკა, ფაქტობრივად, უფასო გახდა და ხელოვანი ფულს ვეღარ იღებს, თუ კონცერტებს არ ჩაატარებს ან, მაგალითად, ბოტასებს არ გამოუშვებს.

"მზად ვარ, ფეხზე მდგარი მოვკვდე, რადგან მუხლმოყრილი აღარ ვიცხოვრებ", — განაცხადა კანიემ.