უკრაინის შეიარაღებული ძალების მთავარსარდალი ვალერი ზალუჟნი აცხადებს, რომ რუსეთის საოკუპაციო ძალებმა ლუგანსკის ოლქის გამშვებ პუნქტს ცეცხლი გაუხსნეს, რა დროსაც გაეროს ლტოლვილთა უმაღლესი კომისარიატის ჰუმანიტარული დახმარების მანქანების კოლონა იქ იმყოფებოდა.

მესაზღვრეებმა მშვიდობიანი მოქალაქეები თავშესაფარში გადაიყვანეს. ზალუჟინის თქმით, შემთხვევას მსხვერპლი არ მოყოლია. მისივე ინფორმაციით, ჰუმანიტალური დახმარების ოთხმა მანქანამ ტერიტორია დატოვა, 8 კი გამშვებ პუნქტთან რჩება.

"ხაზს ვუსვამ, რომ ეს არის რუსეთის საოკუპაციო ძალების მიერ საერთაშორისო ჰუმანიტარული სამართლის ნორმებისა და მინსკის შეთანხმებების კიდევ ერთი უხეში დარღვევა", — აცხადებს მთავარსარდალი.

უკრაინის შეიარაღებული ძალების ცნობით, 17 თებერვალს რუსეთმა ცეცხლის შეწყვეტის შეთანხმება 60-ჯერ დაარღვია, მათგან 43 შემთხვევაში მან მინსკის შეთანხმებით აკრძალული იარაღი გამოიყენა. დღეს, დილის 9 საათის მდგომარეობით კი რუსეთის საოკუპაციო ძალების მიერ ცეცხლის შეწყვეტის რეჟიმის 20 დარღვევა დაფიქსირდა, მათგან 15-ში მინსკის შეთანხმებით აკრძალული იარაღი იყო გამოყენებული.

გუშინ ოკუპანტებმა დონბასიდან ლუგანსკის ოლქის ერთ-ერთ დასახლებას ცეცხლი გაუხსნეს, ჭურვი კი საბავშვო ბაღს მოხვდა. ამას უკრაინის პრეზიდენტმა, ვოლოდიმირ ზელენსკიმ "დიდი პროვოკაცია" უწოდა და ხაზი გაუსვა უკრაინაში დიპლომატების დარჩენის აუცილებლობას.

რუსეთის მტკიცების პარალელურად, რომ უკრაინის საზღვრის სიახლოვიდან რუსული ჯარები გაჰყავთ, აშშ-ის პრეზიდენტის ადმინისტრაციის ოფიციალური წარმომადგენელი ამბობს, რომ ბოლო დღეებში უკრაინის საზღვართან რუსი სამხედროების რიცხვი 7 000-ით გაიზარდა. ზელენსკიც უარყოფს, რომ რუსეთის ჯარები გადიან. მისი თქმით, ამას რეალურად ვერ ხედავენ და მხოლოდ ესმით მის შესახებ.

გაიგე მეტი: